VIDEO/ U vesh si fantazmë, deputeti italian përjashtohet nga Parlamenti 14/05 21:54
Një takim personal me Vladimir Putinin nuk do t’i zgjidhte të gjitha problemet, por mund të jetë një fitore politike në gjetjen e një formule për afrimin e paqes, tha Volodymyr Zelensky në një intervistë me revistën gjermane Spiegel.
Presidenti ukrainas nuk e përjashtoi plotësisht mundësinë që Putini të shkojë në Turqi këtë javë.
“Para së gjithash, nuk besoj vërtet se Putini është i aftë të takohet me mua personalisht. Më duket se ai ka frikë. Por nëse ndjen një goditje të fortë në ekonominë e tij, atëherë, sipas mendimit tim, ekziston ende mundësia që ai të vijë”, tha Zelensky.
Ai gjithashtu vuri në dukje se do të preferonte që takimi të zhvillohej në Ankara, siç i tha Erdoganit në një bisedë telefonike. Por nëse Putini vendos të shkojë në Stamboll, atëherë ukrainasi është gati të shkojë atje për ta takuar atë.
Zelensky shpjegoi se një takim i tillë është i nevojshëm për të gjetur një formë që do ta afrojë fundin e luftës.
“Nëse takohem me Putinin, kjo duhet të rezultojë në një fitore politike, një armëpushim ose një shkëmbim të burgosurish për të gjithë. Dhe nëse ai nuk vjen, kjo do të thotë se nuk dëshiron një fitore politike për asnjërën palë”, tha presidenti ukrainas.
Duke folur për qëndrimin e palës amerikane, Zelensky shprehu mendimin se Trump duhet të jetë i bindur se Putini po gënjen. Ai duhet ta kuptojë me prova se nuk janë ukrainasit ata që po i ngadalësojnë këto procese.
Presidenti ukrainas shprehu gjithashtu shpresën se SHBA-të do të prezantonin një paketë të re sanksionesh të forta “shumë të rrezikshme për Rusinë”.
Kur u pyet për kryenegociatorin e Trump, Steve Wittkof, Zelensky tha se nuk kishte folur kurrë me të, as në telefon.
“Më duket se diçka shkoi keq me Wittkofin”, vuri në dukje kreu i qeverisë ukrainase, duke shpjeguar se kishte thirrur të gjithë këshilltarët e sigurisë në Kiev.
Siç raportohet, të shtunën e kaluar udhëheqësit e Ukrainës, Francës, Gjermanisë, Polonisë dhe Mbretërisë së Bashkuar, me mbështetjen e Shteteve të Bashkuara, i dhanë një ultimatum Rusisë për të zbatuar një armëpushim 30-ditor.
Në këmbim, Putin propozoi një takim të delegacioneve në Stamboll më 15 maj. Zelensky u pajtua, por Putin ende nuk ka shprehur gatishmërinë e tij për të shkuar në Turqi.
Top Channel
