Takim “kokë më kokë” me Vladimir Putin? Trump i gatshëm të shkojë në Turqi: Do e mendoj seriozisht 14/05 13:30
Të paktën 18 persona humbën jetën të martën si pasojë e sulmeve izraelite ndaj spitaleve në Rripin e Gazës, vetëm pak orë pas një pauze të shkurtër në luftime që çoi në lirimin e pengut izraelito-amerikan, Edan Alexander, 21 vjeç, i rrëmbyer nga Hamasi më 7 tetor 2023.
Një nga sulmet goditi kompleksin e Spitalit Evropian pranë Khan Younis-it, duke shkaktuar dëme të rënda në infrastrukturë. Pamjet e publikuara nga agjencia AFP tregojnë kratere të mëdha dhe çarje në oborrin e spitalit. Një autobus i dëmtuar ishte bllokuar në një vrimë të krijuar në rrugë.
“Brenda spitalit të gjithë vraponin nga frika – pacientë dhe të plagosur – disa me paterica, të tjerë duke bërtitur për fëmijët, ndërsa disa zvarriteshin nëpër shtretër,” deklaroi për AFP-në fotoreporteri vendas, Amro Tabash.
Mediat izraelite raportuan se objektivi i sulmit ishte Mohammed Sinwar, vëllai i liderit të mëparshëm të Hamasit, Yahya Sinwar, i vrarë në një operacion në tetor 2024. Ushtria izraelite deklaroi se kishte goditur një “qendër komande të Hamasit” që ndodhej poshtë spitalit, ndërsa Hamasi e mohon shfrytëzimin e objekteve shëndetësore për qëllime ushtarake.
Një tjetër sulm preku Spitalin Nasser në Gaza, ku ushtria izraelite tha se kishte në shënjestër figura kyçe të Hamasit, përfshirë gazetarin e njohur palestinez Hassan Aslih. Sipas Ministrisë së Shëndetësisë në Gaza, një person tjetër humbi jetën në këtë sulm.
Izraeli akuzon Aslihun për përfshirje në sulmet e 7 tetorit, duke pretenduar se ai kishte dokumentuar dhe shpërndarë pamje të dhunës gjatë atij inkursioni. Hamasi e hedh poshtë këtë version, duke theksuar se gazetari ishte thjesht duke kryer punën e tij.
Lirimi i pengut Edan Alexander të hënën u cilësua nga kryeministri izraelit Benjamin Netanyahu si rezultat i “presionit ushtarak dhe diplomatik”, ndërsa falënderoi ish-presidentin amerikan Donald Trump për rolin e tij. Hamasi, nga ana tjetër, pretendoi se lirimi u arrit pas bisedimeve të drejtpërdrejta me SHBA-në.
Netanyahu theksoi se operacioni në Gaza nuk do të ndalet pa shkatërrimin e plotë të Hamasit. “Një armëpushim i përkohshëm mund të ndodhë, por ne do ta çojmë luftën deri në fund,” tha ai të martën.
Ndërkohë, kreu i ndihmës humanitare të OKB-së, Tom Fletcher, i bëri thirrje Këshillit të Sigurimit të veprojë “për të parandaluar gjenocidin” në Gaza dhe për të siguruar respektimin e ligjit ndërkombëtar humanitar.
Të martën mbrëma, ushtria izraelite u bëri thirrje civilëve në disa zona të Gazës veriore të evakuohen, pas zbulimit të dy predhave të lëshuara nga territori. Krahu i armatosur i Xhihadit Islamik mori përgjegjësinë për sulmet me raketa, të rralla në javët e fundit.
Që nga sulmi i Hamasit në tetor 2023, ku humbën jetën 1,218 persona – kryesisht civilë – militantët kanë rrëmbyer 251 persona, nga të cilët 57 ende mbahen në Gaza. Sipas ushtrisë izraelite, 34 prej tyre konsiderohen të vdekur.
Në përgjigje, ofensiva izraelite ka shkaktuar vdekjen e të paktën 52,908 personave në Gaza, shumica civilë, sipas Ministrisë së Shëndetësisë së drejtuar nga Hamasi – shifër e konsideruar e besueshme nga Kombet e Bashkuara.
Top Channel
