Bilanci tragjik i zjarrit në Koçan të Maqedonisë së Veriut thellohet edhe më shumë, teksa sot ka ndërruar jetë një tjetër i plagosur.
29-vjeçari Aleksandar Gavrillovski, i cili po kurohej në Lituani, humbi betejën për jetën. Lajmin e bëri të ditur ministri i Shëndetësisë, Arben Taravari, sipas të cilit edhe dy pacientë të tjerë janë në gjendje kritike për jetën.
Numri i viktimave arrin në 60. Zjarri më 16 mars, i cili vrau kryesisht të rinj dhe la gati 200 njerëz të plagosur, shpërtheu kur një fishekzjarr shkaktoi një zjarr në një lokal nate në qytetin lindor të Koçanit.
Të plagosurit në gjendje më të rëndë janë transportuar në spitale në disa vende evropiane, me ndihmën e ofruar nga BE.
Klubi i natës Pulse u zbulua më vonë nga autoritetet se kishte shkelje të shumta të sigurisë dhe licencimit. Tridhjetë e katër persona janë në paraburgim për zjarrin, duke përfshirë një ish-ministër të financave dhe shtatë oficerë të lartë policie. Prokurori i shtetit Ljupço Kocevski tha se të dyshuarit po hetoheshin për vepra që parashikojnë dënime deri në 20 vjet burg, nëse shpallen fajtorë.
Autoritetet në vendin e vogël të Ballkanit Perëndimor me rreth 1.8 milionë banorë thanë muajin e kaluar se kishin mbyllur dhjetëra klube nate dhe vende argëtimi pas zjarrit.
Disa protesta janë zhvilluar në të gjithë vendin si dhe në Greqinë fqinje, me demonstruesit që bëjnë thirrje për drejtësi për vdekjet.
Top Channel
