Kryeredaktori u përfshi aksidentalisht në grupin e bisedave, The Athlantic zbulon mesazhet rreth sulmeve të SHBA-së në Jemen 26/03 13:54
Me një parade madhështore në Athinë dhe ceremoni të ndryshme në gjithë vendin dhe jo vetëm, grekët kanë festuar përvjetorin e Revolucionit të 1821, një kryengritje popullore kundër Perandorisë Osmane që mbaroi disa vite me vonë dhe arriti kulmin me krijimin e një shteti të pavarur.
Para udhëheqjes politike të vendit për me se dy orë në sheshin Syntagma, parada ushtarake është ndjekur nga mijëra qytetarë e të ftuar. Përveç forcave ushtarake kanë parakaluar edhe grupe me kostumet tradicionale nga revolucioni i vitit 1821 .
Pas presidentit të Greqisë edhe kryeministri Kyriakos Mitsotakis ka deklaruar se ashtu si 204 vjet më parë kur grekët u bashkuan dhe ia dolën mbanë, ashtu duhet të jenë edhe sot.
“Grekët në atdheun tonë dhe kudo në botë festojnë sot aktin e regjistrimit të lindjes së shtetit grek. Ajo që më 25 mars 1821 dukej e pamundur për shumë njerëz, u bë realitet nëntë vjet më vonë”, tha Mitsotakis.
Edhe në Shtëpinë e Bardhë në një ceremoni për nder të Ditës së Pavarësisë së Greqisë Presidenti Donald Trump ka përshëndetur përfaqësues të komuniteti grek në SHBA duke theksuar se greko-amerikanët e kanë bekuar Amerikën me guximin, patriotizmin dhe aftësitë e tyre të jashtëzakonshme”.
“Më 25 mars 1821, patriotët grekë filluan luftën e tyre fisnike për të rimarrë fatin e tyre nga kontrolli i një perandorie të huaj, një perandorie shumë të fuqishme. Nën këtë administratë, ne do të vazhdojmë të nderojmë virtytet, idealet dhe shpirtin e kësaj trashëgimie të shkëlqyer dhe kjo është e mrekullueshme.”, tha Trump.
Në Greqi , së bashku me domethënien kombëtare, 25 Marsi festohet gjithashtu tradicionalisht si dita fetare e Ungjillëzimit të Hyjlindëses Mari.
Top Channel
