Dalin dy sondazhe në Gjermani, e djathta rikthehet në pushtet. E dyta renditet ekstremi i djathtë, Scholz i treti

Qytetarët gjermanë votuan këtë të diel në zgjedhjet e përgjithshme parlamentare, që do të vendosë për qeverinë e re, që do t’i udhëheqë në vitet e ardhshme.

Votimi u mbyll zyrtarisht në të gjithë vendin në orën 18.00 dhe nga exit-pollet e para kryeson partia e CDU/CSU (Bashkimi Demokristian i Gjermanisë) e drejtuar nga konservatori Friederich Merz, me 29% të votave.

Nga exit poll-et e para, opozita e qendrës së djathtë CDU/CSU ndiqet nga partia rivale e ekstremit të djathtë, AFD (Alternativa për Gjermaninë), me 19.5% të votave, e cila shënon rezultatin më të mirë që nga Lufta e Dytë Botërore.

E treta në listë rezulton partia e social-demokratëve (SPD), e kancelarit aktual, Olaf Scholz, me 16% të votave. Të Gjelbrit me 13,5% dhe partia e majtë Die Linke me 8,5%. Në rrezik për të mos hyrë në Bundestag janë liberalët e FDP me 4,9% dhe BSW me 4,7%, ndërkohë që pragu elektoral është 5%.

Sipas të dhënave, pjesëmarrja e votuesve ka shkuar në 84%, më e larta që nga viti 1990.

Në këto zgjedhje, janë pesë kandidatë për kancelar, numri më i lartë ky i regjistruar ndonjëherë. Merz është favorit për ta zëvendësuar Scholzin si kancelar, por nuk është ende e qartë se cilat koalicione qeverisëse do të jenë të mundshme pas zgjedhjeve.

Sondazhi nga ZDF:

CDU – CSU – 28,5%

AFD – 20%

SPD – 16.5%

Gjelbrit – 12%

Linke – 9%

FDP – 5%

BSW – 5%

Sondazhi nga ARD: 

CDU – CSU – 29%
AFD – 19,5%
SPD – 16%
Gjelbrit – 13.5%
Linke – 8.5%
FDP – 4.9%
BSW – 4,7%

Exit poll-et bazohen në anketat e votuesve që sapo kanë hedhur votën e tyre në qindra qendra votimi përfaqësuese. Ato priren të jenë relativisht të sakta.

Top Channel