Vetëm pas një dite që mbërritën në Shqipëri, 5 emigrantë azilkërkues do të rikthehen në Itali.
Në përfundim të procedurave të verifikimit, që ka përfunduar rreth mesnatës, u vendos që 3 minorenë dhe 2 të sëmurë nuk do të qëndrojnë bashkë me 44 të tjerët në kampet e Gjadrit në Shqipëri.
44 emigrantët do të presin në tokën shqiptare fillimisht vendimin e Gjykatës së Romës, që pritet të vendosë brenda 48 orëve për vlefshmërinë e mbajtjes së tyre në vendin tonë dhe më pas do të presin një përgjigje për kërkesën e tyre për azil.
Shumica e emigrantëve ishin nga Bangladeshi, ndërsa pjesa tjetër vinin nga Egjipti, Bregu i Fildishtë dhe Gambia.
Emigrantët mbërritën mëngjesin e së martës në portin e Shëngjinit me anijen e marinës italiane “Casiopea”.
Ky është kontingjenti i tretë i emigrantëve që mbërriti 2 muaj pas pezullimit të marrëveshjes së arritur mes Shqipërisë dhe Italisë për shkak të vendimeve të gjykatave atje, të cilat urdhëruan në dy rastet e para dërgimin e të gjithë emigrantëve në vendin fqinj.
Kjo pasi Gjykata e Romës nuk konfirmoi si të ligjshëm ndalimin e tyre, me argumentin se vendet e tyre të origjinës nuk ishin “të sigurta” në të gjithë territorin e tyre.
Qeverisë italiane iu desh të miratonte një dekret të veçantë, që mori edhe mbështetjen e Gjykatës së Kasacionit.
Por fjala e fundit për ligjshmërinë e ndalimit të emigrantëve në det dhe dërgimin e tyre në kampet e ngritura në Shqipëri do ta thotë Gjykata Europiane e Drejtësisë, e cila pritet të shprehet më 25 Shkurt.
Top Channel
