Një dokument i deklasifikuar i ish-Sigurimit të Shtetit tregon se si Parashqevi Simaku dhe të rinj të tjerë në Qytetin Studenti këndonin mbrëmjeve në konvikte brohorisnin “Rroftë Instituti”, “Poshtë Fashizmi”.
Të rinjtë tentonin të sfidonin izolimin dhe ndrydhjen, ndërsa duket se Simaku ishte frymëzim për ta. Ishte artistja që mezi prisnin ta shihnin dhe ta dëgjonin teksa këndonte.
Letra e plotë:
Tiranë, më 21.03.1989
Lënda: Për një ngjarje të ndodhur në qytetin e Studentëve
MATERIALI JU DERGUA SHOKUT RAMIZ
Më datën 20.03.1989, mbas orës 21.30 në qytetin e Studentit është krijuar një zhurmë me të bërtitura të mëdha, e cila ka tërhequr vëmendjen e opinionit.
Rreth orës 21.30 në kohën e mbarimit të emisionit televiziv “Muzika për të gjithë” në godinën nr. 7, tri vajza të Institutit të Lartë të Arteve F.G, V.G dhe E.S kanë kënduar me zë të ulët këngë dashurie. Këto jane shoqëruar edhe nga djem e vajza të godinave të tjera me britma e me fjalë banale. Më të theksuara kanë qenë në godinën e studentëve të Institutit të Lartë të Arteve. Vajzat e Institutit të Lartë të Arteve flisnin të gjitha së bashku “rroftë Instituti”. “Artet janë bota” dhe këto shoqëroheshin me britma jo vetëm nga këto dy godina, por edhe nga të tjerat. Po kështu në godinën nr. 5, disa djem kishin dalë në tarracë, digjnin letra, shami, bërtisnin “Viva Parashqevi, viva”, duke kërkuar ardhjen e Parashqevi Simakut.
Janë dëgjuar shprehje “poshtë fashizmi”, pastaj këndonin “bashkoj shokë me ne në çetë”, “Ejani mblidhuni këtu këtu bashkë me me ne”, etj.
Në godinën nr.3 në katin e katërt ka dalë edhe një student i paidentifikuar lakuriq, të cilit i bëhej dritë me letra që digjeshin nga shokët e tij.
Çështjen e kemi në ndjekje.
Ministri i Punëve të Brendshme
Simon Stefani
Top Channel
