Teatri i Kukullave rinovohet në godinën shekullore! Shfaqja e mirëseardhjes për dashamirësit e vegjël

Pas rinovimit të plotë, fëmijët do të shijojnë shfaqjen në një godinë të ngrohtë, të sigurt dhe me teknologjinë moderne me një skenë dhe auditor multifunksional.

Falë financimit nga program Eu4culture, në këtë institucion nuk ka më asnjë gjurmë nga shenjat që la pas tërmeti i 2019. Salla ku 100 vite më parë u vendos parlamenti shqiptar, sot gumëzhin nga duartrokitjet dhe buzëqeshjet e të vegjëlve.

“Vërtetë tërmeti hapi një vrimë të madhe në tavanin e kësaj godine, por gjendja e saj prej kohësh ishte për të ardhur keq dhe në ndërkohë ne kishim nisur projektin për një tjetër godinë të Teatrit të Fëmijëve që tanimë ka filluar të marrë formë, diku në anën tjetër të bulevardit të Tiranës. Po punojmë përditë që së shpejti të hapim dhe derën tjetër, siç thashë, të Teatrit të madh të Fëmijëve dhe do të vazhdojmë të bëjmë të gjitha përpjekjet që të krijojmë sa më shumë hapësira”, u shpreh kryeministri Edi Rama.

I pranishëm në ceremoninë e hapjes së Teatrit së ringjallur në zemër të sheshit Skënderbej, kryeministri Edi Rama nuk kurseu batutat…

“Këtu ka qenë Parlamenti shqiptar dikur dhe unë uroj që juve të rriteni duke parë sa më pak Parlamentin shqiptar, deri kur të mos keni mundësi më ta evitoni, por përsa kohë keni mundësi ta evitoni, ju lutem shumë ju fëmijëve të na konsideroni kukulla dhe të silleni me ne si me kukullat, por ndryshe nga kukullat tuaja që juve i merrni afër, i përkëdhelni, ne na konsideroni si ato kukullat që është mirë të mbahen larg, që futen në skenë për të krijuar një atmosferë shqetësimi deri kur drita pastaj vjen, muzika fillon prapë dhe ata ikin nga skena“.

Me një koreografi mirëseardhjeve, trupa e Teatrit Kombëtar të Kukullave fton dashamirësit e vegjël, që këtë ngjarje e shohin si dhuratë për festat e fundvitit, të ndjekin shfaqjet e larmishme që do të pasojnë, duke nisur me shfaqjen premierë në 20 dhjetor.

Top Channel