PD, bojkot vetëm për një ditë/ Vendimi përfundimtar po merret në mbledhjen e grupit demokrat

Përjashtim me porosi të liderit në izolim bëri vetëm Komisioni për Çështjet Europiane ku kryenegociatorja e Shqipërisë Majldinda Dhuka do të prezantonte dokumentin konfidencial të çeljes së grup kapitujve të parë themelorë me Bashkimin Europian.

Demokratët u kujdesën të ndajnë aksionin e tyre nga çështjet e integrimit.

Tabaku: PartiaDemokratike është e vetëdijshme që sot ndodhemi larg një vendi me kushte të plotësuara, por ne besojmë se ky është një proces për Shqipërinë e shqiptarët jo për politikën.
Por, qëndrimi i opozitës nuk u mirëprit nga socialistët.

Peleshi: Thatë që e respektoni procesin e integrimit por se di si quhet mbështetje ky fillim. Për një proces që nuk është i yni as i juaji por i shqiptarëve ju lutem mos kemi marrje peng mikrofoni.

Krahas thirrjeve të kolegëve të majtë, opozitarët vijuan të këmbëngulin se mazhoranca nuk ka plotësuar asnjë kusht për hapjen e negociatave.

Paloka: Ky parlament nuk respekton as Kushtetuesen. Çështja Xhaçka tregon qëndrimin e kësaj mazhorance ndaj kësaj gjykate.

Deputeteja Olta Xhaçka megjithëse akuzat e Edi Palokës i dëgjoi në sy nuk replikoi me të duke ia lënë mbrojtjen sërish në dorë kolegëve.

Etilda Gjoni: Deri në këtë pikë, në këto rezultate me këtë pozicion negociues na ka sjellë drejtësia dhe me drejtësinë nuk negociojmë ashtu siç nuk komentojmë asnjë vendim gjykate.

Me mbylljen e dyerve të Komisionit, demokratët vendosën të largohen duke mos e votuar dokumentin që i paraprin mbledhjes së Konferencës së Dytë ndërqeveritare e parashikuar për në 15 tetor.

Paloka: Nuk kemi kompleks le të na akuzojnë se nuk e duam integrimin, se e kemi treguar se kush jemi ne dhe ata, por ne nuk mund të mbyllim sytë kur na mbahet lideri ne izolim dhe na burgoset deputeti.

Burgosja e Ervin Salianjit bëri që opozita të radikalizojë qëndrimin në Parlament dhe jashtë tij.

Top Channel