Një grua u vetëmbyt këtë të shtunë duke u hedhur nga ura e lumit Buna.
Sipas policisë, rreth orës 16:25 kanë marrë njoftim se një person është hedhur në ujërat e lumit Buna.
Më pas ata kanë shkuar menjëherë në adresën e dhënë dhe me një varkë janë futur në lumë dhe kanë nisur kërkimet.
Ata kanë gjetur trupin e pajetë të Sh. O., 63 vjeç, banuese në lagjen “Dobraç”, e cila dyshohet se është vetëhedhur nga ura e vjetër e lumit Buna.
Sipas policisë, nga këqyrja paraprake e trupit të pajetë, nuk janë konstatuar shenja dhune, si dhe nga veprimet e para hetimore dyshohet se ajo vuante kohët e fundit nga depresioni.
Grupi hetimor në drejtimin e prokurorit, vijon punën për zbardhjen e plotë të rrethanave të ngjarjes së rëndë.
Kujtojmë se më 2 maj Shkodra dhe e gjithë shoqëria shqiptare u trondit kur Alma Arrazi vendosi t’i jepte fund jetës duke u hedhur nga ura e Bunës së bashku me tre fëmijët e saj të mitur.
Për këtë ngjarje është arrestuar bashkëshorti Erdgys Arrazi, i akuzuar se shtyu drejt vetëvrasjes Almën, pasi ai kishte një lidhje jashtëmartesore me një 17-vjeçare.
Dy ditë më parë, Erdgys Arrazi, i dyshuar si shkaktar për vetëvrasjen e gruas së tij, Almës, bashkë me tre fëmijët, u la në burg nga Gjykata e Apelit.
Para togave të zeza, i riu shpërtheu në lot dhe u shpreh se është i pafajshëm, ndërsa tregoi se ende nuk kishte shkuar pranë varrit të tre fëmijëve të ndjerë.
Avokati paraqiti të gjitha dokumentet, që tregojnë se Alma Arrazi vuante nga depresioni dhe për rrjedhojë, vetëvrasjen e ka kryer në kushte të rënduara psikologjike.
Top Channel
