![](https://top-channel.tv/wp-content/uploads/2024/09/0-2024-09-07T190138.257-800x450.jpg)
Gjykata e Durrësit vendosi masën “Arrest në burg” për dy personat që u arrestuan në Portin e Durrësi me 7 pako kokainë në furgonin me targa angleze.
Mbrojtja kërkoi arrest në shtëpi për ta ose garanci pasurore, por kjo nuk u mor parasysh nga trupa gjykuese.
Sipas gazetares së Top Channel, Vali Qyrfyçi, seanca ndaj 38-vjeçarit Arjan Doci dhe 39-vjeçarit Mentor Çuni, kushërinj, djem tezesh, u zhvillua me dyer të mbyllura.
Kompania “Bledi Trans” së cilës i përket furgoni ku u gjet kokaina është në pronësi të Fatbardh Çunit emigrant prej 11 vitesh në Angli.
Mentor Çuni, vëllai i Fatbardhit ka pranuar që ka marrë porosinë e drogës nga një person të cilit ia ka dhënë dy ditë para nisjes furgonin dhe ndërhyrjen në të e ka bërë ai.
Kompania“Bledi Trans” transportonte sende dhe pako nga komuniteti shqiptar në Angli dhe i sillte në Shqipëri. Furgoni ndiqte itinerarin Shqipëri – Itali – Angli.
Sipas informacioneve, vijojnë hetimet për të implikuar të tjerë në këtë rrjet trafiku droge.
Gjatë kontrollit të furgonit me targa angleze me destinacion Britaninë e Madhe, kokaina u gjet brenda fundit të dyfishtë të krijuar në mjet, poshtë sediljes së shoferit.
Kokaina ishte paketuar në qese vakumi për mos t’u kuptuar nga qentë anti-drogë.
Top Channel