Prokuroria e Posaçme ka zbardhur atentatin ndaj juristit Mitri Prifti.
Genti Nderjaku alias Kili, alias Ekil Nderjaku, një prej 6 të akuzuarve për atentatin ndaj ish-prokurorit Arjan Ndoja, në bashkëpunim me persona të tjerë ende të paidentifikuar gjatë harkut kohor 04.09.2020 – 30.01.2021, ka siguruar kushtet për të kryer vrasjen e Priftit.
“Po kështu i pandehuri Genti Nderjaku (alias Kili, alias Ekil Nderjaku), në bashkëpunim me persona të tjerë ende të paidentifikuar gjatë harkut kohor 04.09.2020 – 30.01.2021, ka siguruar kushtet dhe mjetet materiale për të kryer vrasjen e shtetasit Mitri Prifti, duke konsumuar në këtë mënyrë elementët e veprave penale të parashikuara nga nenet 80, 28/4, 333/a/1 dhe 334/1 i Kodit Penal”, sipas SPAK.
39-vjeçari Mitri Prifti u arrestua në vitin 2021 pasi ishte shpallur në kërkim për tentativën e vrasjes së Edison Begajt, ngjarje e ndodhur më 29 maj 2021, në fshatin Kaninë.
Mitri Prifti ishte i veshur si polic kur qëlloi Begajn, i cili ndodhej në hyrje të banesës së tij në Kaninë.
Tentativa për vrasje ishte një hakmarrje për një incident që kishte ndodhur në një nga lokalet e zonës së Lungomares në Vlorë. Edison Begaj ishte konfliktuar verbalisht me Mitri Priftin dhe në debat e sipër Begaj kishte qëlluar me shpullë në debat e sipër Priftin.
Më 29 maj, Mitri i maskuar i zë pritë Begajt dhe e qëlloi me armë në fillim në bark e më pas në këmbë. Shënjestra e atentatit mori disa plumba, por pa rrezik për jetën.
Edison Begaj ishte në listën e operacionit forca e ligjit pasi ka qenë i dënuar me 7 vite e 6 muaj burgim, për drogë dhe armë. Por edhe autori i atentatit juristi Mitri Prifti është i njohur për organet e drejtësisë.
Në vitin 2016 ai denoncoi se ai dhe kushëriri i tij ndërtues ishin kërcënuar nga grupi Shullazi në Tiranë. Por brenda pak ditësh i tërhoqi pas akuzat, duke u shprehur se nuk e njihte Emiljano Shullazin dhe as të afërmin e tij, Blerim Shullazi, madje as që kishte dijeni mbi ndonjë kërcënim të mundshëm të ndërtuesit.
Top Channel
