Edhe udhëheqësit e Bullgarisë kanë kritikuar Presidenten e sapo zgjedhur të Republikës së Maqedonisë së Veriut, Gordana Siljanovska-Davkova, pasi ajo iu referua vendit të saj si “Maqedoni” në ceremoninë e saj të betimit më 12 maj.
Në një deklaratë, kryeministri në detyrë dhe ministri i Jashtëm i Bullgarisë Dimitar Glavçev tha se Bullgaria nuk pranon deklarata dhe sjellje që bien ndesh me Traktatin e Miqësisë, Fqinjësisë së Mirë dhe Bashkëpunimit të vitit 2017 dhe, në parim, me marrëveshjet ndërmjet Bashkimit Evropian dhe Republikës së Maqedonisë së Veriut.
“Bullgaria në mënyrë të përsëritur dhe qartë e ka shprehur qëndrimin e saj se marrëveshjet duhet të zbatohen në mënyrë rigoroze”, tha Glavçev, sipas medias lokale.
Ai tha se Maqedonia e Veriut ishte anëtare e NATO-s “nga e cila burojnë detyrimet dhe përgjegjësitë përkatëse”.
“Ne jemi të bindur se perspektiva evropiane e Republikës së Maqedonisë së Veriut do të varet tërësisht nga zbatimi gjithëpërfshirës i marrëveshjeve të korrikut 2022 të miratuara nga të gjithë”, tha Glavçev.
Presidenti bullgar Roumen Radev tha: Bullgaria nuk pranon deklarata dhe sjellje që bien ndesh me Traktatin e Miqësisë, Fqinjësisë së Mirë dhe Bashkëpunimit të vitit 2017, si dhe marrëveshjet e tjera ndërkombëtare që ka nënshkruar Republika e Maqedonisë së Veriut”.
“Bullgaria në mënyrë të përsëritur dhe qartë e ka shprehur qëndrimin e saj se traktatet duhet të zbatohen”, tha Radev.
“Kujtoj gjithashtu se Republika e Maqedonisë së Veriut është anëtare e NATO-s, nga e cila burojnë obligimet dhe përgjegjësitë përkatëse”, tha ai.
“Jam i bindur se perspektiva evropiane e Republikës së Maqedonisë së Veriut varet nga zbatimi i rreptë i traktateve ndërkombëtare në të cilat është palë, si dhe nga korniza negociuese e miratuar nga Këshilli Evropian në korrik 2022, e cila, për informim të institucioneve përgjegjëse në Republikën e Maqedonisë së Veriut, nuk do të rishikohen.”
Raportet nga kryeqyteti i Maqedonisë së Veriut thanë se kur Siljanovska-Davkova hoqi fjalën “Veri” nga emri i vendit gjatë betimit të saj, ambasadorja e Greqisë në Shkup, Sophia Philippidou, u largua nga ceremonia.
Top Channel
