Kërkesa e grupit të PD për Xhaçkën në Kushtetuese, zbulohen dy deputetët që ‘tradhtuan’ Bashën dhe bashkuan firmat me Rithemelimin

Gazment Bardhi arriti të sigurojë 44 firma për ta ridërguar  çështjen për herë të dytë në Kushtetuese duke peshkuar vota edhe nga radhët e PD-se zyrtare. Mes firmëtarëve ra në sy edhe nënshkrimi i  dy deputeteve të rreshtuar ne kampin e Lulzim Bashës. Top Channel ka zbuluar shkresën që kreu i grupit demokrat depozitoi në Kushtetuese ku rreshtohen edhe emrat e  Eralda Tase Bano dhe Ori Nebiajt.

Mes firmëtarëve ka dhe deputet të distancuar nga PD kohët e fundit si Agron Shehaj, i cili  ka bashkuar votat me ish koleget e tij të grupit parlamentar. Beteja  për mandatin e Olta Xhaçkës duket se ka shkrirë edhe akujt e demokratëve me Dashamir Shehi i cili krahas divorcit politik me grupimim e Sali Berishës, nuk nguroi të ndihmojë aleatët e tij historik.

Deputetët e Partisë së Lirisë të cilët nuk janë në ditët e tyre më të mira për shkak të sherrit brenda llojit, kanë gjetur kohë për të hedhur firmën në shkresën e Gazment Bardhit, Monika Kryemadhi, Erisa Xhixho dhe Petrit Vasili iu bashkuan kolegëve opozitarë për të goditur në Kushtetuese deputeten e Partisë Socialiste.

Gazment Bardhi u kujdes të mbante sekret emrat e firmëtarëve, por rrjedhja e emrave ne media solli reagimin e deputetes se PD zyrtare Eralda Tase Bano e cila nxitoi te sqarojë pozicionin e saj.

“Në asnjë çast vota ime kundër zonjës Xhaçka nuk ka sesi të jetë pozicionim i imi në krahun e rithemelimit. Unë i përkas Partisë Demokratike zyrtare siç e quajnë disa, Partisë Demokratike të udhëhequr nga Lulzim Basha.

Këtë zgjedhje e kam bërë që ditën e parë dhe sot jam më e bindur se kurrë për pozitën time, sqaroi deputetja Bano.  Lulzim Basha u kap në befasi gjatë konferencës për shtyp kur u pyet për deputetët e tij qe bashkuan votat me Gazment Bardhin pasi ai doli kundër vendimit për të çuar në gjykatë Kushtetuese mandatin e Xhaçkës pasi kjo e fundit e ka dhënë verdiktin e saj për këtë çështje.

Top Channel