Grupi i Krizave: Pakica serbe në Kosovë, kyçe për normalizimin dypalësh

Në raportin më të fundit të saj, organizata që harton analiza të pavarura dhe këshilla për parandalim, zgjidhje dhe menaxhim të konflikteve, thotë se “Kosova po e fiton betejën për kontrollin e veriut të saj me shumicë serbe, ndërsa shpresat për normalizim mes dy vendeve po shuhen”. Sipas grupit, të dyja palët si dhe mbështetësit e jashtëm, duhet të punojnë për zbutjen e rreziqeve afatshkurtra nga dhuna në veriun e banuar me shumicë serbe.

Institucionet e mbetura serbe në territorin e Kosovës, të cilat i mbijetuan luftës së vitit 1999 dhe pavarësisë së Kosovës në vitin 2008, thuhet në raport, po shpërbëhen si pasojë e një operacioni paraushtarak të mbështetur nga Serbia në shtator të vitit 2023. “Ndërsa rezistenca e kufizuar e dhunshme mbetet e mundshme, Kosova veriore, e cila shpresonte për autonomi ose bashkim me Serbinë, po i nënshtrohet pa dëshirë autoritetit të Prishtinës.

Këto janë ditë të vështira për pakicën serbe, e ardhmja e së cilës është jetike për afrimin mes Beogradit dhe Prishtinës”, thuhet në raport, i cili përshkruan zhvillimet që nga viti 2021, bojkotimin e institucioneve të Kosovës nga punonjësit serbë në vitin 2022, përleshjet e forcave paqeruajtëse me protestuesit serbë në pranverën e vitit 2023 dhe sulmin e një grupi serbësh të armatosur që vranë një pjesëtar të policisë së Kosovës, me 24 shtator të vitit të kaluar.

Raporti kujton edhe një herë marrëveshjen e pazbatuar që u arrit mes palëve në shkurt dhe mars të vitit të kaluar, e cila parashihte njohjen de facto të Kosovës nga Serbia dhe më shumë autonomi për veriun e banuar me shumicë serbe.

Top Channel