Pas kërkesës për fletarrestime për Netanyahun dhe liderët e Hamasit, reagojnë politikanë nga e mbarë bota: Nuk ndihmon në arritjen e një armëpushimi… 20/05 20:50
Republika Çeke ka shpallur të shtunën ditë zie kombëtare pasi një person i armatosur vrau 14 persona dhe plagosi 25 të tjerë në një universitet në Pragë.
Presidenti Petr Pavel shprehu se ishte i trishtuar për humbjen e jetëve.
Personi i armatosur, për të cilin policia tha se ishte “eliminuar”, besohet të ketë vrarë edhe babanë e tij dhe mund të jetë i lidhur me vdekjen e dy personave javën e kaluar, sipas BBC.
Kjo konsiderohet një nga ngjarjet masive më të rënda në historinë e fundit evropiane.
Të shtënat filluan rreth orës 15:00 me orën lokale (14:00 GMT) të enjten në ndërtesën e Fakultetit të Arteve të Universitetit Charles në qendër të kryeqytetit çek.
Personi i armatosur hapi zjarr në korridoret dhe klasat e ndërtesës, duke vrarë në mënyrë të rastësishme, ndërsa stafi dhe studentët përdorën mobilje për të mbrojtur veten në dhoma.
Pamjet dramatike të shpërndara në mediat sociale tregojnë njerëz që kërcejnë drejt sigurisë nga një parvaz i jashtëm disa kate lart. Dëgjohen edhe të shtëna armësh.
Policia thotë se i armatosuri ishte një student 24-vjeçar në universitet dhe nuk kishte precedentë të mëparshëm penalë, megjithëse shton se u gjet një “arsenal i madh armësh dhe municionesh”.
Para të shtënave, policia kishte marrë një raport se i dyshuari besohej se po shkonte në Pragë nga një qytet aty pranë me qëllimin për të vrarë veten. Pak kohë më vonë, babai i tij u zbulua i vdekur.
Në një deklaratë, kryeministri çek Petr Fiala tha: Ne jemi të gjithë të tronditur nga ky akt i tmerrshëm. Është e vështirë të gjesh fjalë për të shprehur dënimin nga njëra anë dhe, nga ana tjetër, dhimbjen dhe pikëllimin që po ndjen e gjithë shoqëria jonë në këto ditë para Krishtlindjeve.
Ai tha se e shtuna do të jetë një ditë zie, duke shtuar se flamujt do të valëviten në gjysmështizë në të gjitha ndërtesat publike dhe se në mesditë do të mbahet një minutë heshtje. Shumë ngjarje sportive dhe kulturore janë anuluar.
Të enjten në mbrëmje, njerëzit ndezën qirinj dhe lanë lule pranë vendit ku ndodhën të shtënat. Motivi i të shtënave është ende i paqartë.
Policia tha se kishte informacione të pakonfirmuara nga një llogari e mediave sociale se sulmi ishte frymëzuar nga një incident i ngjashëm në Rusi, megjithëse nuk dha detaje të mëtejshme.
Ata thanë se personi i armatosur dyshohej gjithashtu për vrasjen e një të riu dhe vajzës së tij dy muajshe, të cilët u gjetën të vdekur në një pyll në periferi të Pragës më 15 dhjetor.
Top Channel
