Situata dramatike/ 108 trupa të pajetë shtrihen në spitalin Kamal Adwan të Gazës, disa të grumbulluar në një karrocë

Trupat izraelite kanë përparuar drejt objektit, me të shtëna të forta armësh dhe shpërthime në afërsi të tij gjatë 24 orëve të fundit.

Një gazetar brenda spitalit, Mahmoud Al-Sabbah, dërgoi sot një video për CNN, ku shiheshin 30 trupave të mbuluar me çarçafë të bardhë në një oborr.

Disa trupa të tjerë u grumbulluan në një karrocë sepse ambulancat nuk ishin në gjendje të vepronin në zonë. Është e paqartë se sa kohë kishin qenë trupat atje, por ai tha se anëtarët e familjes po përpiqeshin të identifikonin të dashurit.

Dr. Munir Al-Barsh, drejtor i përgjithshëm i Ministrisë së Shëndetësisë në Gaza, tha se nuk kishte furnizim me energji elektrike në spitalin Kamal Adëan dhe kishte më shumë se 7,000 njerëz të zhvendosur atje. Kirurgjia ishte bërë e pamundur për shkak të mungesës së energjisë, tha ai.

Vetëm katër spitale janë duke funksionuar në veri të Gazës dhe rreth 55 ambulanca janë jashtë shërbimit, tha Al-Barsh. Ai gjithashtu pohoi se ndërsa 400 njerëz të plagosur kishin mundur të largoheshin nga Gaza përmes kalimit Rafah, më shumë se 40,000 të plagosur mbetën në Rripin e Gazës.

“Situata është shumë e rrezikshme dhe [ka] të shtëna të forta. Tanket dhe automjetet izraelite po përparojnë drejt spitalit dhe janë një bllok larg”, tha gazetari Al-Sabbah për CNN, ku teksa fliste, në sfond dëgjohej një zjarr i fortë.

Në një video tjetër prej rreth 30 sekondash, tingujt e të shtënave dhe shpërthimeve janë konstante.

Një gazetar tjetër në spital, Anas Al-Sharif, tha për CNN se situata është shumë e vështirë.

“I gjithë sistemi mjekësor është shembur brenda spitalit dhe kushdo që lëndohet përfundon si martir brenda spitalit”, tha Al Sharif.

Ministri izraelit i Mbrojtjes Yoav Gallant përmes një deklarate të hënën tha se operacionet “që po ndodhin tani, në veri të Rripit të Gazës, së shpejti do të çojnë në thyerjen e të gjithë zonës së qytetit të Gazës dhe veriut të Rripit të Gazës”.

Top Channel