Zbardhet takimi i Rutte me Trump: Diskutuan sfidat e sigurisë globale me të cilat përballet aleanca 23/11 14:13
Ka shumë zyrtarë talebanë që do të mbështesin anulimin e ndalimit të shkollimit për vajzat në Afganistan, raporton The Guardian.
Nën sundimin e talebanëve, Afganistani është bërë i vetmi vend në botë ku vajzave u ndalohet shkollimi përtej moshës 11 vjeç. Grupi gjithashtu ka imponuar atë që është përshkruar si një politikë e “aparteidit gjinor”, duke i ndaluar gratë të punojnë dhe të ekspozohen në hapësirat publike.
Por thyerjet e brendshme që ekzistojnë brenda talebanëve për arsimimin e vajzave mund të përdoren nga komuniteti ndërkombëtar për të lobuar me ta për të rihapur shkollat e vajzave, tha Rangina Hamidi, e cila kohët e fundit vizitoi vendin.
“Talebanët nuk janë monolit. Ka dallime mendimesh brenda talebanëve, ashtu si me çdo grup tjetër. Dhe është e qartë, veçanërisht për çështjen e ndalimit të arsimimit të vajzave, ka shumë brenda talebanëve që mbështesin ndryshimin e dekretit,” tha ajo.
“Pavarësisht nëse bota i njeh apo jo talebanët, për gati 40 milionë afganë, ku të paktën gjysma e të cilëve janë gra dhe vajza, ky është një realitet i jetuar. Dhe më dhemb që edhe pas dy vitesh, komuniteti ndërkombëtar nuk e ka kuptuar se si të sillet me talebanët, në kurriz të njerëzve dhe vajzave të Afganistanit. Jo shumë kohë më parë qeveria amerikane, së bashku me aleatët e saj dhe agjencitë ndërkombëtare, u angazhuan në bisedimet politike me talebanët. Pse atëherë, i njëjti komunitet global sot ka problem me talebanët?”, shton Hamidi.
Hamidi ka propozuar mbështetjen e zgjidhjeve vendase nga afganët të cilët po gjejnë mënyra për të punuar kundër ndalimeve talebane, duke përfshirë përdorimin e hapësirave ku lejohen vajzat, si medresetë, shkollat fetare, si një rrugë alternative për arsimim.
“Medresetë sot janë sinonim vetëm me shkollimin fetar, por historikisht këto janë hapësira për të mësuar. Vendit i mungojnë fondet për të investuar në shkolla dhe ka komunitete ku djemtë dhe vajzat janë jashtë shkollës. Megjithatë, si vend mysliman, ka xhami, të cilat janë gjithashtu vende mësimi, të paktën një në çdo rreze prej 2 km. Pra, pse nuk mund ta përdorim këtë hapësirë për të ndihmuar fëmijët tanë të mësojnë duke përdorur një kurrikul të standardizuar?” ajo tha.
Një medrese në provincën Badakhshan, Afganistan. Fotografia Omer Abrar, AFP
Pikëpamjet e Hamidit morën një reagim të përzier në një tubim feminist në Stamboll këtë muaj, organizuar nga Iniciativa e OKB-së për Arsimin e Vajzave (Ungei), ku ajo foli. Disa pjesëmarrëse femra afgane ishin kritike ndaj çdo propozimi për të normalizuar marrëdhëniet me një grup që vazhdon të kufizojë të drejtat themelore të grave.
Selma Acuner, një anëtare e Koalicionit të Grave në Turqi, pjesë e rrjetit feminist Ungei, tha: “Të punosh me talebanët, të cilët qëllimisht shtypin të drejtat e grave dhe zbatojnë interpretimin e tyre të ideologjive radikale fundamentaliste përmes medreseve, paraqet një situatë shumë paradoksale“.
Acuner pranoi se shkollat fetare mund t’u ofrojnë vajzave një mundësi për të vazhduar përfshirjen në një hapësirë mësimore, por tha: “Ne nuk mund të presim që institucionet fetare të kompensojnë aksesin e humbur në arsimin e mesëm formal. Ato nuk përputhen me qëllimin më të gjerë arsimor dhe mundësitë që ofrohen në të ardhshmen”.
Acuner tha se ishte thelbësore të dëgjosh dhe të kuptosh përvojat e grave në Afganistan përpara se të binte dakord për një qasje të tillë. “Përndryshe, kjo do të nënkuptonte miratimin për një regresion të thelluar në të drejtat e grave në mbarë botën,” tha ajo.
Top Channel
