Seancat e radhës për Berishën dhe Malltezin, shtyhen pas mesdite

Trupi gjykues monokratik i përbërë nga gjyqtarja Iliriana Olldashi, urdhëroi shtyrjen e seancës gjyqësore për në datë 24.11.2023, ora 14:00, njofton Gjykata e Posaçme e Apelit për Korrupsionin dhe Krimin e Organizuar.

Avokatët e Berishës kanë ankimuar vendimin e GJKKO-së, që la në fuqi masat e sigurisë “Detyrim për t’u paraqitur në policinë gjyqësore” dhe “Ndalimi i daljes jashtë shtetit”, për ish-kryeministrin. Përmes mbrojtjes, Berisha kërkon shuarje të masës së sigurisë.

Berisha ka munguar në të gjitha seancat gjyqësore të mbajtura për të, ndaj e njëjta gjë pritet të ndodhë edhe këtë të premte.

Edhe seanca për dhëndrin e Berishës, Jamarbër Malltezin, që akuzohet për korrupsion pasiv për privatizimin e ish-Kompleksit Sportiv Partizani, është shtyrë për në orën 15:00.

Një ditë më parë, avokati mbrojtës i Jamarbër Malltezit, kërkoi të çlirohen nga masa e sekuestros preventive rreth 25 asete pasurore, midis tyre edhe llogari bankare, një vilë, apartamente, por edhe aksione të shoqërive që janë nën hetim për dosjen e privatizimit të kompleksit Partizani.

Ndërkohë, pas nisjes së procesit në Gjykatën e Apelit të Posaçëm, Prokuroria e Posaçme ka kërkuar që të përjashtohet nga trupa gjyqësore dhe gjykimi i kësaj çështje gjyqtarja e Apelit të Posaçëm Iliriana Olldashi, pasi sipas SPAK zonja Olldashi ka konflikt interesi.

Gjyqtarja Iliriana Olldashi pak ditë më parë zbuti, por nuk ka argumentuar ende vendimin masën e ‘arrestit me burg’ në ‘arrest shtëpiak’ për Jamarbër Malltezin.

Ndërkohë, Garda e Republikës ka shtuar masat e sigurisë fizike për gjyqtaren antikorrupsion, Irena Gjoka, që dha më herët masën arrest me burg për Malltezin dhe detyrim paraqitje për Berishën, të cilës nga katër truproja i janë vendosur 6 edhe në banesë. Gazetarja e Top Channel Anila Hoxha, mësoi nga Garda, që shtoi se shtimi i sigurisë ndodhi mbas sulmeve verbal ndaj gjyqtares, pas vendimit të datës 20 tetor, ku vendosi detyrim paraqitje  për ish kryeministrin Sali Berisha dhe arrest me burg për Jamarbër Malltezin.

Top Channel