Akuzohet për spiunazh në favor të Rusisë dhe Iranit, arrestohet punonjësi i ambasadës amerikane në Oslo 22/11 22:38
Një grup i madh militant në Irak, që mbështetet nga Irani, ka paralajmëruar se mund të shënjestrojë caqe shtesë amerikane, pasi avionët luftarakë amerikanë vranë disa militantë.
Sulmet amerikane ishin në kundërpërgjigje të sulmit të së hënës në bazën ajrore Al-Asad, ku gjenden forcat amerikane. Në këtë sulm, për herë të parë, militantët përdorën raketa balistike me rreze të shkurtër veprimi.
Avionët luftarakë amerikanë sulmuan qendrën komanduese të Hezbollahut Kataib, dhe një qendër tjetër komanduese të këtij grupi militant në jug të Bagdadit të matën, thanë dy zyrtarë të mbrojtjes që folën në kushte anonimiteti.
Në kohën e sulmeve, në këto qendra kishte pjesëtarë të Hezbollahut Kataib, por zyrtarët thanë se ende nuk kanë mundur të konfirmojnë se sa janë vrarë.
Por, zyrtarët e milicive në Irak thanë se nga sulmi janë vrarë tetë anëtarë të këtij grupi.
Sulmet ajrore amerikane erdhën pas sulmeve të mëhershme hakmarrëse ndaj militantëve të mbështetur nga Irani, të cilët sulmuan një bazë ajrore të përdorur nga SHBA-ja në Irak.
Grupi Hezbollah Kataib përmes një deklarate tha se po e shqyrton mundësinë “e zgjerimit të caqeve” nëse ushtria amerikane vazhdon me sulme, duke theksuar se sulmet amerikane “nuk do të kalojnë pa u ndëshkuar”.
Sulmet e grupeve militante që mbështeten nga Irani në Irak dhe Siri, ndaj ndërtesave amerikane nisën më 17 tetor, në ditën kur një shpërthim në një spital në Rripin e Gazës vrau qindra persona.
Që atëherë, të paktën 66 sulme me raketa janë kryer ndaj ushtrisë amerikane, duke plagosur të paktën 62 ushtarë.
Top Channel
