Fotoreporterë apo të infiltruar? Dyshimet për reporterët që dokumentuan sulmin e 7 tetorit në Izrael

Eslaiah, një profesionist i pavarur, i cili gjithashtu punon për CNN, solli foton e parë nga sulmi të një tanku izraelit të djegur dhe më pas kapi me aparatin e tij të infiltruarit që hynin në Kibbutz Kfar Azza.

HonestReporting ka bërë një investigim, duke marrë pamje nga postimet e Eslaiah, i cili më pas i kishte fshirë në “X”, në të cilat ai dokumentoi veten duke qëndruar përpara tankut izraelit. Ai nuk kishte veshur jelek me logon e dukshme “Press” apo helmetë, dhe mbishkrimi arab i postimit të tij në Twitter ishte: “Live nga brenda vendbanimeve të Rripit të Gazës”.

Përveç kësaj, ai është shfaqur dhe në një foto që tregon Eslaiah me liderin e Hamasit dhe organizatorin e masakrës së 7 tetorit, Yahya Sinwar, por fotoja nuk ka një datë të përcaktuar se kur është shkrepur.

Reporteri tjetër, Masoud, i cili gjithashtu punon për The New York Times, ishte gjithashtu atje, pikërisht në kohën e duhur për të shkelur në territorin izraelit dhe për të bërë më shumë foto tankesh të djegura nga Hamasi.

Ali Mahmud dhe Hatem Ali u pozicionuan për të marrë fotografi të rrëmbimeve të tmerrshme të izraelitëve në Gaza. Mahmud kapi kamionçinën që mbante trupin e gjermano-izraelitit Shani Louk.

Shani Louk ishte në mesin e atyre që u rrëmbyen dhe u vranë nga Hamasi nga festivali i muzikës më 7 tetor
Reuters ka publikuar foto nga dy fotoreporterë, të cilët gjithashtu kanë qenë në kufi në kohën e infiltrimit të Hamasit: Mohammed Fayq Abu Mostafa dhe Yasser Qudih.
Ata fotografuan një tank izraelit të djegur në anën izraelite të kufirit, por Abu Mustafa shkoi më tej: Ai bëri foto të një turme linçuese, duke brutalizuar trupin e një ushtari izraelit që u tërhoq zvarrë nga tanku.

“Agjencitë e lajmeve mund të pretendojnë se këta njerëz thjesht po bënin punën e tyre; dokumentimin e krimeve të luftës. Por nuk është kaq e thjeshtë”, shkruan HonestReporting.
Yousef Masoud, Ali Mahmud dhe Hatem Ali gjithashtu u kanë ofruar mediave perëndimore foto të konfliktit që nga 7 tetori. Ata kanë punuar me CNN, AP, Reuters dhe The New York Times , thotë Honest Reporting .

Tani është e qartë se Hamasi kishte planifikuar sulmin e tij të 7 tetorit ndaj Izraelit për një kohë shumë të gjatë: shkalla e tij, qëllimet brutale dhe dokumentacioni i tij masiv janë përgatitur për muaj, nëse jo vite. Gjithçka u mor parasysh, vendosjet, koha, si dhe përdorimi i kamerave të trupit dhe videove të celularëve për të ndarë mizoritë. A mund të supozohet se “gazetarët” u gjendën herët në mëngjes në kufi pa koordinim paraprak me terroristët? Apo ishin pjesë e planit?

Edhe nëse ata nuk i dinin detajet e sakta të asaj që do të ndodhte, pasi u zbulua, a nuk e kuptuan se po shkelnin një kufi etik? Dhe nëse po, a i kanë njoftuar agjencitë e lajmeve? Një lloj komunikimi ishte padyshim i nevojshëm, para, pas ose gjatë sulmit, për të publikuar fotot”.

Pas këtij raporti të HonestReporting, CNN “shkarkoi” fotoreporterin e pavarur të Gazës, Hassan Eslaiah, pas pretendimeve se ai dhe pesë të tjerë ishin të lidhur me terroristët e Hamasit, kur ata pushtuan Izraelin më 7 tetor dhe kishin njohuri paraprake për sulmin.

Qeveria e Izraelit ka kërkuar një shpjegim nga mediat, të cilat të gjitha kanë mohuar të kenë njohuri paraprake për sulmin.

Në përgjigje të kritikave, një zëdhënës i CNN tha për DailyMail: “Ne nuk kishim njohuri paraprake për sulmet e 7 tetorit. Hassan Eslaiah, i cili ishte një gazetar i pavarur që punonte për ne dhe shumë media të tjera, nuk punonte për rrjetin më 7 tetor. Që sot i kemi ndërprerë të gjitha lidhjet me të”.

Në një deklaratë të mëparshme, rrjeti tha se nuk kishte gjetur ‘arsye për të dyshuar në saktësinë gazetareske’ të punës së tij.

Associated Press, në deklaratën e saj, mohoi të kishte ndonjë njohuri paraprake për sulmin dhe këmbënguli se fotot e para që mori ishin marrë pas fillimit të tij.

“Fotografitë e para të marra nga AP nga çdo profesionist i pavarur tregojnë se ato janë marrë më shumë se një orë pas fillimit të sulmeve. Asnjë personel i AP-së nuk ishte në kufi në kohën e sulmeve dhe as ndonjë punonjës i AP-së nuk e kaloi kufirin në asnjë moment. Ne nuk po punojmë më me Hassan Eslaiah, i cili kishte qenë herë pas here një profesionist i pavarur për AP dhe organizata të tjera ndërkombëtare të lajmeve në Gaza. AP përdor imazhe të marra nga profesionistë të pavarur në mbarë botën. Kur pranojmë foto të pavarura, ne ndërmarrim hapa të mëdhenj për të verifikuar vërtetësinë e imazheve dhe që ato tregojnë atë që pretendohet. Roli i AP është të mbledhë informacion mbi ngjarjet e lajmeve të fundit në mbarë botën, kudo që ato ndodhin, edhe kur ato ngjarje janë të tmerrshme dhe shkaktojnë viktima masive”.

Ndërsa, një zëdhënës i Reuters lëshoi një deklaratë ku thuhej se agjencia ka marrë fotografi më 7 tetor nga fotografë, me të cilët nuk ka pasur më parë marrëdhënie.
“Fotografitë e publikuara nga Reuters janë bërë dy orë pasi Hamasi lëshoi raketa në të gjithë Izraelin jugor dhe më shumë se 45 minuta pasi Izraeli tha se persona të armatosur kishin kaluar kufirin. Gazetarët e stafit të Reuters nuk ishin në terren në vendet e përmendura në artikullin e HonestReporting”, thuhet gjithashtu në deklaratë.

Top Channel