U sulmua nga dy qen disa ditë më parë, ndërron jetë 84-vjeçari në spitalin e Durrësit
06/11/2023 12:08
Foto/ Makina këput në dysh shtyllën, pa drita zona në Tiranë 17/11 21:29
I moshuari i cili u sulmua nga dy qen pitbull në lagjen numër 13, në zonën e Plazhit në Durrës në datën 2 nëntor ka ndërruar jetë këtë të hënë.
Ai nuk ka mundur t’u mbijetojë plagëve të shumta të marra në kokë dhe trup dhe ka humbur jetën në reanimacionin e Spitalit Rajonal të Durrësit.
Viktima H.B. ishte duke ecur në rrugë kur dy qentë e sulmuan agresivisht.
Menjëherë kanë ndërhyrë banorë të zonës, të cilët janë përpjekur të ndihmojnë të moshuarin, i cili mori plagë të rënda.
Pronari i qenve pitbull që sulmuan të moshuarin është vënë në pranga. Ndaj 44-vjeçarit me iniciale A.L. rëndon vepra penale “Braktisja e kafshës të shoqërimit”.
Theksojmë se qentë endacakë dhe jo vetëm, bëhen shpesh shqetësim për qytetarët, që duhet të përballen me frikën e sulmeve të papritura.
Më parë, pre e sulmeve nga qentë kanë rënë edhe fëmijët. Një 10-vjeçar u kafshua në vitin 2021 në mënyrë makabre nga një qen endacak. Ai ishte duke luajtur me shokët e lagjes, në rrethinat e Tiranës, kur një qen agresiv e sulmoi papritur. Një tjetër u sulmua në rrugën “Llambi Bonata”, nga një qen, të cilin pronari e kishte lënë të lirë.
Problem mbetet braktisja ose mungesa e ruajtjes së qenve të racave të rrezikshme nga pronarët e tyre. Çdo muaj, në bashkitë e vendeve, sidomos në kryeqytet, ka denoncime nga qytetarët, për qentë e braktisur në rrugë të racave agresive si pitbull, rottweiler, doberman etj, të cilët cilësohen si të rrezikshëm.
Top Channel
