Protestojnë policët e Kosovës! Njësitë elitë që punojnë në veri kërkojnë më shumë para për rrezikun

Ata kundërshtojnë shtesat që i ka vendosur qeveria e Kosovës, 150 euro, shtesat e rrezikshmërisë që ka tetë muaj që nuk i kanë marrë. Në protestë ishte edhe njësia për eksplozivë e dëminim me të njëjtat kërkesa.

“Prandaj edhe një herë kërkojmë nga ana e juaja që propozimin e dhënë për shtesat e rrezikshmërisë ta rishikoni dhe t’i merrni parasysh kërkesat tona dhe presim që së shpejti të takohemi dhe së bashku t’i zgjidhim.Kërkesat janë si në vijim: Kategorizimi si njësi të veçanta dhe përfshirja në listën e ekspertëve. Rrezikshmëria të caktohet ne 50% te pagës bazë dhe shtesa për kushte specifike të punës”, tha pjesëtari i njësisë speciale.

Njësitet që u përballën edhe me sulmin terrorist në Banjskë kërkuan trajtim më të dinjitetshëm nga ana e institucioneve.

“Ne jemi unik në kërkesat tona sepse janë kërkesa legjitime dhe të nevojës urgjente dhe nuk do të zmbrapsemi deri në realizimin e tyre. Prandaj ftoj Kryeministrin dhe Qeverinë që të marrin hapa konkret në realizimin e tyre. I nderuar kryeministër, ju i dini shumë mirë kërcënimet dhe rreziqet që operatorët e këtyre njësive i bartin gjatë gjithë kohës, jo vetëm gjatë kryerjes së detyrave zyrtare por edhe ne jetën private. E kjo është pikërisht për shkak të natyrës së punës të cilën ne e bëjmë. Prandaj mos luani me dinjitetin tonë, mos luani me ndjenjat e familjeve tona”, kërkoi pjesëtari i njësisë speciale.

Ndërkohë paralajmëruan edhe masa të tjera në rast se hasin në vesh të shurdhër, pasi shuma e shtesave të tyre është ulur për rreth 65 euro.
Pjesëtarët e këtyre njësive janë të specializuar dhe certifikuar në luftën kundër terrorizmit, lirimin e pengjeve si dhe në rastet ku cenohet siguria Kombëtare përkatësisht janë të specializuar në trajtimin e kërcënimeve me eksplozivë dhe bomba, dhe për intervenime në situata ku rrezikshmëria vlerësohet të jetë ekstreme.

Top Channel