Rrezikojnë jetën në punë, qeveria propozon shtesa në pagat për shtatë kategori të Policisë së Kosovës

Shtesat nga 45-150 euro janë propozuar për Njësinë Speciale Intervenuese, Njësinë për Ndërhyrje të Shpejtë, Njësia për Mbrojtje të Afërt, Njësitë Speciale Operative, K-9, njësinë për eksplozivët dhe deminim dhe pjesëtarët e patrullave kufitare.

“Pas shqyrtimeve dhe analizave që kemi bërë me ministritë përkatës, si qeveri kemi ardhur deri te propozimi për shtesat e rrezikshmërisë për pjesëtarët e Policisë së Kosovës të cilën do ta prezantoj sot para jush. Në këtë propozim përfshihen gjithsej 7 kategori të pozitave në Policinë e Kosovës, të cilat janë subjekt i shtesave të rrezikshmërisë. Shtesat për njësitë elitare (Njësia Speciale Intervenuese, Njësia për Ndërhyrje të Shpejtë dhe Njësia për Mbrojtje të Afërt), janë nga 150 euro shtesë pagës bazë. 120 euro shtesë për Njësitë Speciale Operative, K-9 dhe njësia për eksplozivët dhe deminim. Pjesëtarët e patrullave kufitare do të përfitojnë nga 100 euro në muaj, ndërsa pjesëtarët e hetuesisë nga 75 euro shtesë në muaj. Ekipet reaguese dhe patrullat, që njëherazi përbëjnë edhe numrin më të madh të Policisë së Kosovës, do të marrin nga 60 euro shtesë në muaj. Kurse, policëve që angazhohen për sigurimin e objekteve dhe ata në menaxhim të operacioneve, do t’ju ndahen nga 50 dhe respektivisht 45 euro shtesë të rrezikshmërisë. Kjo zgjidhje merr parasysh në veçanti situatën e tensionuar në veri të Kosovës dhe do të vazhdojë për aq kohë sa të jetë e nevojshme”, u tha në mbledhjen e Qeverisë.

Menjëherë pas këtij propozimi, reagoi Njësia Speciale Intervenuese, duke shprehur pakënaqësi për shtesën. kështu, kjo njësi njoftoi protestë me 1 nëntor.

Top Channel