Bashkimi Europian ka dalë me një deklaratë të gjatë rreth kërkesave dhe pritshmërisë të tij ndaj kryeministrit të Kosovës, Albin Kurti dhe presidentit serb Aleksandër Vuçiç, duke i treguar të dy palëve se me kokëfortësinë që po tregojnë, janë duke rrezikuar mundësitë për avancim në rrugën europiane.
Në deklaratë, riktheksohet përgjegjësia e Kosovës dhe Beogradit për të respektuar parimin e konfidencialitetit në Dialog, si element kyç i çdo procesi negociator të ndjeshëm politik.
“BE-ja mbetet po aq e shqetësuar për mungesën e progresit nga të dyja palët në shtensionimin e situatës në veri të Kosovës, disa muaj pas shpërthimit të fundit të dhunës që la të plagosur qytetarët, trupat e KFOR-it, forcat e rendit dhe përfaqësuesit e mediave, disa me pasoja të rënda dhe të përhershme”, thuhet aty.
Pavarësisht thirrjeve të përsëritura nga BE-ja dhe partnerët e tjerë ndërkombëtarë, hapat e ndërmarrë deri më tani mbeten të pamjaftueshëm dhe situata e sigurisë në veri mbetet e tensionuar, nënvizohet më tej. Në këtë kontekst, lëvizjet e Kosovës, duke përfshirë shpronësimet e tokës në veri të Kosovës, urdhrat e dëbimit, telekomunikacionin dhe përdorimin e forcave speciale të policisë për detyrat e policisë në komunitet, nuk janë në përputhje me sundimin e ligjit dhe rrezikojnë të kontribuojnë për rritjen e mëtejshme të tensioneve, vazhdon deklarata që thekson se masat e ndërmarra nga Brukseli mbeten në fuqi, duke përfshirë pezullimin e takimeve të nivelit të lartë me Kosovën.
BE-ja insistoi që themelimi i Asociacionit të ndodhë, e madje pa kushte. Shefi i diplomacisë së Bashkimit Evropian, Josep Borrell, tha se blloku evropian kërkon që Kosova dhe Serbia “pa vonesa” të nisin zbatimin e marrëveshjes drejt normalizimit të raporteve.
“Ajo se çfarë duam ne, çfarë kërkojmë është nisja e zbatimit bazuar në propozimin tonë, pa vonesa të mëtejme, dhe kjo përfshin edhe obligimin për të dyja palët që të zbatojnë plotësisht marrëveshjet e arritura më herët në dialog”, u shpreh Borrell.
Thirrje për kthim urgjent në procesin e dialogut drejtoi edhe këshilltari i lartë i Departamentit amerikan të Shtetit, Derek Chollet, i cili bisedoi për këtë çështje me presidenten e Kosovës, Vjosa Osmani, me të cilën u takua së bashku me të dërguarin e Uashingtonit për Ballkanin Perëndimor, Gabriel Escobar.
“Një bisedë e mirë me presidenten Vjosa Osmani për zotimin tonë të përbashkët për të ardhmen euroatlantike të Kosovës, për nevojën për të shtensionuar situatën dhe për angazhimin urgjent në dialogun për normalizimin e raporteve me Serbinë që lehtësohet nga BE-ja, që është kyç për stabilitetin rajonal dhe integrimin drejt Bashkimit Europian”, tha Chollet.
Pas reagimit të DASH, edhe Miroslav Lajçak u takua me Cholletin e Escobarin, duke deklaruar se: Kemi të njëjtin lexim të situatës në Ballkan, jemi në një linjë.
Top Channel
