Riaktivizohet zjarri në pyllin me pisha në Peshtan. Top Channel mëson se flakët po përhapen me shpejtësi për shkak të terrenit “grykë” dhe të erërave të forta që ndihmojnë përhapjen e flakëve.
Nga zjarri i djeshëm kishte mbetur një vatër zjarri e cila është riaktivizuar duke shkaktuar vatra të tjera.
Drejtori i zjarrfikëseve të Bashkisë Fier, Zija Hyka, ka pohuar se situata është shumë e vështirë.
“Tre grupe zjarrfikëse janë në terren. Po kërkohen përforcime nga repartet e zjarrfikseve të Patosit. Zjarri po përhapet me shpejtësi në një sipërfaqe të gjerë, duke u afruar shumë shpejtë në rrugën e vjetër rurale Fier – Cakran në vëndin e qujatur “Qafa e Shkozës”.
Fillimisht priten ndihma nga kolegët e Patosit dhe nëqoftëse situata vazhdon e njëjtë do kërkohet ndihmë nga helikopteri si një ditë më parë”, ka përfunduar shefi zjarrfikseve të bashkisë Fier Zija Hyka.
Terreni është shumë i vështirë, automjetet nuk shkojnë deri afër vatrave të zjarrit dhe punonjësit luftojnë me flakët me pompa uji në shpinë dhe mjete rrethanore, kazma e lopata për të shuar zjarrin.
Top Channel
