Veç emocioneve, diplomatja amerikane Yuri Kim përcolli shumë mesazhe të fshehura pas simboleve, gjatë fjalimit të lamtumirës, në përfundim të mandatit si ambasadore e SHBA-së në Tiranë.
Mesazhet jo verbale që përcjell ambasadorja kanë qenë aq të fuqishme sa ato të drejtpërdrejta. Ndaj sot ajo “foli” edhe përmes stilit të veshjes dhe aksesorëve që kishte zgjedhur për fjalën e saj të lamtumirës.
Nuk kishte si të mos binte në sy spila e dallëndyshes e vendosur në xhaketën e bardhë të ambasadores. Në Mitologji, dallëndyshja është simbol i pranverës, ngrohtësisë dhe rilindjes apo dhe fillimet e reja.
Dallëndyshja simbolizon metamorfozën, ripërtëritjen, shpresën, familjen dhe ringjalljen.
Spila në formë dallëndysheje
Dallëndyshja shtegton dhe rikthehet sërish në folenë e saj dhe me këtë simbol, diplomatja ndoshta ka dashur të na thotë se ajo nuk është larguar përfundimisht nga foleja e saj, Shqipëria, por do të jetë gjithmonë këtu.
Ngjyra e artë e spilës së dallëndyshes tregon suksesin, arritjet dhe triumfin, duke lënë të nënkuptohet se eksperienca disa vjeçare e saj në Shqipëri ishte pozitive.
Diplomatja preferoi ngjyrën e bardhë në fjalimin e lamtumirës si ambasadore e Amerikës në Tiranë, ndryshe nga fjalimi i saj i parë i mirëseardhjes më 27 janar 2020, ku zgjodhi të zezën.
Yuri Kim gjatë fjalimit të saj të parë në Tiranë si ambasadore
E bardha është përdorur në shumë kultura ndër shekuj sepse simbolizon pastërtinë dhe pafajësinë. Sipas sondazheve në Evropë dhe Shtetet e Bashkuara të Amerikës, e bardha është ngjyra më e lidhur me përsosmërinë, të mirën, ndershmërinë, pastërtinë, fillimin, të renë, neutralitetin, paqen apo saktësinë.
Në shoqërinë e Romës së Lashtë e bardha simbolizonte integritetit, forcën dhe autoritetin, duke e bërë atë një nga simbolet më të qëndrueshme. Që nga viti 1566, Papa, udhëheqësi i Kishës Katolike Romake, është veshur me të bardha si simbol i virtytit dhe sakrificës.
Kujtojmë se në ditët e fundit të mandatit si ambasadore në Shqipëri, Yuri Kim ka marrë një detyrë të re. Në Departamentin Amerikan të Shtetit në Washington ajo do të mbajë detyrën e zv. ndihmëses sekretares për çështjet evropiane.
Ndërkohë pas largimit të ambasadores Kim, diplomacinë amerikane në Tiranë do ta përfaqësojë David J. Kostelancik, i cili ka shërbyer edhe më parë si diplomat në vendin tonë.
Nga Erjona Dervishi
Top Channel
