Dëshmitari i nëntë i Zyrës së Prokurorit të Specializuar (ZPS) në gjykimin kundër Thaçit dhe të tjerëve, pritet të përfundojë dëshminë e tij sot.
Menjëherë pas kësaj, në gjykatoren e Speciales do të intervistohet dëshmitari tjetër i mbrojtur i cili mban kodin 3540. Kështu ka bërë të ditur kryetari i trupit gjykues, Charles Smith, në hapje të seancës.
Ndërsa dëshmia e dëshmitarit të nëntë i cili mban kodin 1602 po vazhdon në seancë të mbyllur për publikun. Hashim Thaçi, Kadri Veseli dhe Rexhep Selimi ndodhen në sallën e gjyqit, ndërsa Jakup Krasniqi po e ndjek seancën nga qendra e paraburgimit.
Në këtë çështje gjyqësore deri tani kanë përfunduar dëshminë e tyre tetë dëshmitarë të ZPS-së, të gjithë të mbrojtur, identiteti i të cilëve nuk është bërë i ditur për publikun.
Seancat janë zhvilluar kryesisht të mbyllura për publikun, apo dëshmitë janë shfaqur me përmbajtje të redaktuar. Ish-krerët e UÇK-së, të cilët po akuzohen për krime të pretenduara të luftës, ndodhen në qendrën e paraburgimit në Hagë prej nëntorit të vitit 2020.
Për të gjitha akuzat ata janë deklaruar të pafajshëm.
Top Channel
