“Serbia nuk luan dot me Kosovën”/ Deputeti gjerman, Thomas Hacker: Bisedime të reja pas zgjedhjeve
24/11 12:24
Situata e tensionuar në veri të Kosovës, ka bërë që vendet aleate, ai ato të Bashkimit Evropian dhe Shtetet e Bashkuara të Amerikës, të paralajmërojnë Kosovën për pasoja në raportet bilaterale.
Vendosja e pasojave nga BE dhe SHBA është thënë se po shqyrtohet në rast se Kosova nuk i përmbush detyrimet e saj dhe nuk qetëson situatën në veri të vendit.
Ditë më parë u raportua se SHBA-të pritet të vendosin sanksione edhe ndaj kryeministrit Albin Kurti dhe ministrit të Brendshëm, Xhelal Sveçla.
Duke iu referuar një dokumenti të qeverisë amerikane, dokument ky i cili deri më tash nuk është konfirmuar nga asnjë zyrtar amerikan dhe i cili vetëm është përshkruar nga mediat, thuhej se Kurti dhe Sveçla mund të shpallen “non grata” me justifikimin “se ata janë një kërcënim për sigurinë dhe paqen”.
E lidhur me këto raportime, Telegrafi ka pyetur në Departamentin Amerikan të Shtetit (DASH), të cilët kanë thënë se DASH nuk parashikon veprimet e sanksioneve.
“Departamenti nuk parashikon nëse do të sanksionojë individë apo subjekte, as nuk parashikon nëse planifikon të vendosë sanksione ndaj individëve apo subjekteve”, thuhet në përgjigjen e tyre për Telegrafin.
SHBA-ja dhe BE-ja i kanë paraqitur Kurtit tri kërkesa: qetësimin e situatës në veri, mbajtjen e zgjedhjeve të reja në katër komunat në veri dhe kthimin në dialogun për normalizimin e raporteve Kosovë-Serbi.
Pas këtyre kërkesave, kryeministri Albin Kurit ka dalë me një plan pesë pikësh për qetësimin e situatës në veri. Kurti të martën në një konferencë për media paraqiti pesë pikat e këtij plani.
Në pikën e parë të planit të paraqitur nga Kurti të martën është sundimi i ligjit në katër komunat në veri, nënkupton identifikimin, ndjekjen penale dhe gjykimin e drejtë të të gjithë anëtarëve “të grupeve kriminale që kanë sulmuar Policinë, trupat e NATO-s dhe gazetarët” në veri të Kosovës.
Në pikën e dytë është përmendur largimi i menjëhershëm i grupeve të dhunshme nga territori i Kosovës, në pikën e tretë është thënë se Policia e Kosovës, KFOR apo EULEX do të kryejnë vlerësime të përbashkëta të sigurisë çdo 15 ditë.
Në pikën katër dhe pesë përmendet se Qeveria e Kosovës do të koordinohet me të gjithë akterët dhe do të shpall zgjedhjet e reja në veri, dhe Kosova e Serbia rikthehen menjëherë në dialogun e lehtësuar nga Bashkimi Evropian.
Por, Bashkimi Evropian pavarësisht se ka pranuar këtë plan të Kurtit për de-eskalim të situatës, janë shprehur se nuk kanë parë ndonjë hap të vendosur dhe të nevojshëm nga Kurti për ta qetësuar situatën.
REL dje ka raportuar se Bashkimi Evropian ka përgatitur masa fillestare, si sanksione kundër Kosovës për shkak të mospërfilljes së kërkesave për hapa të menjëhershëm nga Qeveria e Kosovës për uljen e tensioneve në veri.
Sipas këtyre masave, sanksionet do të përfshijnë pezullimin e ftesave për pjesëmarrjen e Kosovës në ngjarjet e nivelit të lartë dhe vizitave dypalëshe nga Bashkimi Evropian dhe vendet anëtare. Takime do të ketë vetëm kur ato duhet të zhvillohen për t’u fokusuar në adresimin e krizës në veri të Kosovës dhe hapave për gjetjen e zgjidhjes.
Sanksioni tjetër pritet të përfshijë punën e përbashkët të grupeve që ekzistojnë mes Kosovës dhe BE-së, e të cilat janë krijuar në bazë të Marrëveshjes së Stabilizim Asociimit (MSA), dhe disa sanksione të tjera.
Tensionet në veriun e Kosovës nisën më 26 maj, kur Policia e Kosovës ndihmoi kryetarët shqiptarë të komunave Zveçan, Zubin Potok dhe Leposaviç të vendosen në objektet komunale, me gjithë rezistencën e banorëve lokalë.
Këta kryetarë u zgjodhën më 23 prill, votime që u bojkotuan nga partitë dhe popullata lokale serbe.
Situata u përkeqësua më 29 maj, kur serbët lokalë u përleshën me ushtarët e misionit të NATO-s në Kosovë, KFOR, ku u plagosën dhjetëra prej tyre./Telegrafi
Top Channel
