Kurti pas takimit me QUINT: Paraqita pesë hapat për ç’tensionimin e situatës në veri

13/06/2023 11:49

Kryeministri i Kosovës, Albin Kurti në një konferencë për media ka folur për takimin e sotëm me ambasadorët e vendeve të QUINT-it, ku ka thënë se ka paraqitur vullnet të plotë për ç’tensionimin e situatës në veri të vendit.

Ai ka thënë se gjatë të hënës ka pasur disa biseda telefonike me ndërkombëtarët, dhe se Kosova është e interesuar që të gjendet një zgjidhje për ç’tensionim të situatës.

“Tema e dytë që dua të flas sot është që ditën e fillova me takimin me QUINT folëm për situatën më vend. Propozimin tim që e kam ndarë me Josep Borrell. Dje në orën 12 kam pasur një telefonatë në lidhje me situatën në veri, kurse sot kam pritur ambasadorët e QUINT. Dje kam qenë në komunikim me Miroslav Lajcak dhe në mbrëmje edhe me ambasadorin Hovenier. Me Borrell dhe vendet e QUINT kam shprehur vullnetin për depërshkallëzim dhe normalizim të marrëdhënieve. Duhet të kuptojmë që eskalimi vjen prej bojkotit me direktiva të Beogradit. Janë këta faktorë që janë burim i tensionit. Megjithatë këto unë ua kam ofruar një listë me hapa konkret“, u shpreh Kurti.

Plani i tij parasheh pesë pika që, sipas tij, ndihmojnë në ulje të tensioneve:

Sundimi i ligjit në katër komunat në veri, që nënkupton identifikimin, ndjekjen penale dhe gjykimin e drejtë të të gjithë anëtareve të grupeve kriminale që kanë sulmuar Policinë, trupat e NATO-s dhe gazetarët.
Grupet e dhunshme të tërhiqen menjëherë nga territori i Kosovës dhe ndalohet çdo akti kriminal kundër institucioneve të Kosovës.
Policia e Kosovës, pjesëtarë të NATO-s dhe EULEX-i të kryejnë vlerësime të përbashkëta të sigurisë, për të garantuar një ambient të sigurt dhe pa rreziqe për të gjithë.
Qeveria e Kosovës të koordinohet me të gjithë akterët dhe të shpallë zgjedhje të parakohshme në katër komunat në veri.
Kosova dhe Serbia t’i rikthehen dialogut të ndërmjetësuar nga Brukseli, dhe një takim i nivelit të lartë të mbahet gjatë kësaj jave.

Top Channel