Lista Serbe u ka bërë thirrje qytetarëve që të mos rrezikojnë sigurinë e ushtarëve të KFOR-it.
Kjo thirrje vjen pas dhunës së ushtruar nga qytetarë serbë kundër forcave të KFOR-it në komunat e veriut të Kosovës, sidomos në Zveçan.
“Lista Serbe u bën thirrje qytetarëve që të mos rrezikojnë sigurinë e ushtarëve të KFOR-it, sepse kushdo që e bën këtë punon kundër interesave të popullit serb”, ka thënë Lista Serbe.
Në komunikatën e Listës Serbe thuhet se pasi mësuan nga mediat se është hedhur një mjet shpërthyes ndaj ushtarëve të KFOR-it në afërsi të ndërtesës së Komunës së Zveçanit, përfaqësuesit e Listës Serbe janë nisur menjëherë në vendngjarje dhe në një bisedë me përfaqësuesit e KFOR-it në terren kanë marrë vesh se “me shumë mundësi ishte një fishekzjarr”.
RTK raportoi se në orët e mbrëmjes është dëgjuar një shpërthim në Zveçan.
Sipas raportimit, një mjet shpërthyes është hedhur në drejtim të trupave të KFOR-it, të cilët janë duke qëndruar në Zveçan.
Top Channel
