Pranë Dhomave të Specializuara në Hagë dëshmitari i pestë ka nisur t’iu përgjigjet sot edhe kundra-pyetjeve të mbrojtjes së ish-kryetarit të Kuvendit, Jakup Krasniqi e cila kryesisht pyetjet e saj i adresoi për vrasjen e personit numër 1.
Pyetjet e avokates mbrojtëse të Jakup Krasniqit, Venkateswari Alagendra fillimisht kishin të bënin me një ankesë që dëshmitari i pestë e kishte bërë.
I pyetur nga mbrojtja e Krasniqit nëse është e saktë ajo që kishte deklaruar në këtë ankesë se numri 1 ishte marrë nga shtëpia, dëshmitari tha se nuk është e vërtetë, por që ka mundur të ndodhë ndonjë gabim në përkthim.
Ndërsa, në pyetjen se a është e saktë që nuk i kanë parë personat me maska që kanë marr numrin 1, por kanë dëgjuar nga fshatarët, dëshmitari tha se ai i ka parë disa persona me maska por nuk i ka njohur të gjithë.
Dëshmitari: Nuk më kujtohet 2-3 i kam pa unë, por tash nuk jam i sigurt 2 a 3.
Alagendra: Keni dhënë shumë dëshmi ku keni thënë se i keni parë 4 persona me maska a ju kujtohet kjo?
Dëshmitari: Tash sa ka pas unë me 2 jam ballafaquar më shumë, ndoshta ka pasur edhe tjerë, por nuk jam i sigurt me i cek më numra saktë.
Mbrojtja e Krasniqit ka adresuar disa pyetje për dëshmitarin e pestë të ZPS-së për një intervistë të 23 janarit 2003 ku kishte përmendur dëshmitari disa nga emrat e personave që dyshoheshin se kanë qenë ekzekutuesit e personit 1.
Alagendra: Në këtë intervistë që keni dhënë keni përmendur emrat e personave që ju dyshoni të kenë qenë ekzekutuesit.
Dëshmitari: Po, kam përmend dy persona që i kam parë, por dy atë ditë që i kam taku unë duke e qu prindin në xhami ata i kam pa personalisht vetë 12 dhe 13
Alagendra: I ke parë pa maska, por këtë nuk e thoni këtu apo jo
Dëshmitari: Varet pyetjen çfarë ma kanë bërë nuk e di varet çka më kanë pyetur atje.
Alagendra: Ajo çfarë thoni në këtë dokument është që unë dyshoj tek dy persona që janë dhënë me emër këtu që janë të dyshuarit për vrasjen e numrit 1.
Dëshmitari: Për vrasjen e numrit 1 të tregoj çka i kam parë pa maska, tash përkthimi qysh është bë nuk mund ta di, këta që i kam parë pa maska t’i kallëzoj 12, 13, 4 dhe 5 këta i kam parë gjatë rrugës dhe 14 dhe 15 që kanë dal pas vrasjes, këta i kam parë para vrasjes këta i kam parë pas vrasjes.
Gjatë dhënies së dëshmisë së tij para Dhomave të Specializuara në Hagë, dëshmitari i pestë i ZPS-së u shpreh se personi i 14-të e ka takuar vetëm në ditën e vrasjes së personit 1 dhe më asnjëherë tjetër.
Dëshmitari: Kam kontaktuar unë numrin 14, është dal pas vrasjes tha që nuk i kam parë edhe 15, kanë qenë bashkë, kur kanë dalë prej malit.
Alagendra: Por nuk thuhet kështu këtu, ajo çfarë thuhet këtu dëshmitar, është se ke dëgjuar thashetheme se numri 14 kishte dëgjuar diku për njerëzit që kishin vrarë numrin 1 por thua që nuk e kam kontaktuar atë për këtë kjo është pyetje ime për ju a ke kontaktuar me këtë person pasi kishte dëgjuar këto thashetheme.
Dëshmitari: Po këta e kam parë personalisht vetë, edhe përkthimi mundet mos me qenë i saktë.
Alagendra: Pra, nuk e keni kontaktuar numrin 14 më pas për të pyetur se kush e dinte apo kush mund të ishte i përfshirë në vrasjen, është një përmbledhje e saktë kjo?
Dëshmitari: Veç aty tek kufoma që ka dal tek vrasja, përpos atë ditë e kam takuar dhe më jo atë ditë kam bërë pyetje tha i dëgjova krismat dola dhe më nuk e kam kontaktuar nuk më kujtohet që e kam kontaktuar.
Alagendra: Ai nuk të kishte thënë asnjëherë ty se kishte dëgjuar për personat që e kishin vrarë numrin 1?
Dëshmitari: I ka dëgjuar krismat dhe ka dal të shikojë se çka është bërë. Ai ka dal prej malit kur i ka dëgjuar krismat, ka dal në rrugë tek krismat dhe unë kam qenë ty kur kanë ardhur këta dhe i ka parë të vrarë.
Redaktime nga Specialja, kishte edhe në përgjigjen e dëshmitarit kur mbrojtja e Krasniqit u interesua të dinte për një deklaratë të 22 prill 2016 që dëshmitari i kishte thënë prokurorisë se numri 12 dhe 13 dyshohen se ishin të përfshirë në vrasjen e numrit 1.
Në gjykatën e Hagës ku po mbahet kjo seancë gjyqësore të pranishëm në sallë janë ish-presidenti, Hashim Thaçi, ish-kryetari i Kuvendit, Kadri Veseli dhe ish-deputeti, Rexhep Selimi, ndërsa edhe këtë seancë të sotme ish-kryetaari Jakup Krasniqi po e përcjell përmes video-lidhjes.
Dëshmitari i pestë i ZPS-së gjatë javës së kaluar u është përgjigjur pyetjeve të Zyrës së Prokurorit të Specializuar dhe kundra-pyetjeve të mbrojtjes së ish-presidentit, Hashim Thaçi dhe ish-kryeparlamentarit, Kadri Veseli dhe ish-deputetit, Rexhep Selimi.
Para këtij dëshmitari kanë dëshmuar edhe katër të tjerë, dëshmia e të cilëve u zhvillua në seancë të mbyllur për publikun.
Ndërsa të mërkurën, trupi gjykues u ka kërkuar parashtrime palëve, deri më 31 maj, në lidhje me hapat konkret që mund të merren për të siguruar që procedurat të jenë publike në shkallë më të lartë.
Ish-krerët e UÇK-së, për të cilët prokuroria pretendon se kanë kryer krime lufte, po gjykohen pas një procedure paraprake që ka zgjatur më shumë se dy vjet.
Gjatë krejt kësaj kohe, ish-presidenti Thaçi, ish-kryeparlamentarët Krasniqi dhe Veseli, si dhe ish-deputeti Selimi, po qëndrojnë në paraburgim në Hagë, ndërsa në paraqitjet e tyre para gjykatës ata janë deklaruar të pafajshëm.
Top Channel
