Kompanitë evropiane akuzohen për eksport pesticidesh të ndaluara drejt Brazilit (fotot)

Evropa ka disa nga kompanitë më të mëdha kimike, duke përfshirë atë zvicerjane Syngenta dhe korporatat shumëkombëshe gjermane BASF e Bayer.

Por një numër pesticidesh e fungicidesh (vrasës parazitësh kërpudhorë) që ata prodhojnë, janë ndaluar në BE prej lidhjeve me shkaktimin e kancerit, problemeve të riprodhimit dhe sëmundjeve neuro-degjeneruese.

Megjithë ndalimin e tyre në BE, miliona dollarë nga këto produkte po eksportohen në fermat e Brazilit që furnizojnë tregun ndërkombëtar të sheqerit, thuhet në raportin e grupeve investigative ‘Lighthouse Reports’ e ‘Repórter Brasil’.

Dokumente të bujqësisë braziliane të marra në kuadër të ligjeve të lirisë së informacionit tregojnë se një kimikat fungicid i krijuar nga BASF me përbërie epoksikonazoli, i ndaluar në BE, është spërkatur në të paktën dy plantacione sheqeri të cilat furnizojnë Nestlé.

Një nga firmat që përdorin këtë fungicid është pjesë e korporatës braziliane të sheqerit Copersucar, e cila ka shitur në Evropë 1miliardë euro sheqer në vitin 2020.

Në shtetin e  São Paulo, plantacioni Usina Atena, po hetohet për pasojat në shëndetin e banorëve që jetojnë në afërsi pas spërkatjes me kimikate të fermës.

Zyrtarë në São Paulo zbuluan se pesticidi i Syngenta Priori Xtra përmban substancat e ndaluara në BE, ashtu si dhe insekticidi Regent 800WG, i prodhuar nga BASF, dhe Certero, i prodhuar nga Bayer, ku përfshihen ingredientët e ndaluar fipronil e triflumuron.

Bayer e BASF vijojnë të thonë se produktet e tyre janë të parrezikshme për njeriun e mjedisin.

Një zëdhënës i Nestlé thotë se furnizuesit e kompanisë respektojnë standardet e praktikat bujqësore.

Ndërsa një zëdhënës i agjencisë rregullatore të pesticideve në BE, DG Sante, tha se eksporti i pesticideve të ndaluara do të eliminohet gradualisht, sipas strategjisë së qëndrueshmërisë së kimikateve, por nuk dha asnjë afat kohor./TheGuardian/

Top Channel