Banka Kombëtare Tregtare vlerësohet nga Global Finance si ‘’Banka më e mirë në Shqipëri për vitin 2023’’

Në njoftimin për shtyp revista Global Finance thekson se fituesit e çmimeve të këtij viti janë ato banka që trajtuan me kujdes e përkushtim nevojat e klientëve në tregje në zhvillim dhe arritën rezultatet më të mira duke hedhur kështu themelet për suksese të mëtejshme në të ardhmen.

Joseph D. Giarraputo, themelues dhe drejtor redaksie i Global Finance në njoftimin për shtyp deklaroi se: “Këtë vit ne vlerësojmë institucionet financiare të cilat ofrojnë gamën më të gjerë të shërbimeve si edhe besueshmërinë e duhur për të krijuar marrëdhënie financiare afatgjata’’ 

Vlerësimi i bankave të 22 vendeve të Evropës Qëndrore dhe Lindore, u realizua nga redaktorët e Global Finance, pas shumë konsultimeve të kujdesshme me drejtuesit e korporatave financiare, bankierë dhe konsulentë bankarë si dhe me analistë në të gjithë botën. Në përzgjedhjen e bankave më të mira, Global Finance analizoi faktorët sasiorë objektiv dhe ata subjektiv. Në kriterët objektiv të vlerësuar përfshiheshin: rritja e aseteve, përfitueshmëria, shtrirja gjeografike, marrëdhëniet strategjike, zhvillimet dhe inovacionet e reja në produkte bankare. Ndërsa në kriterët subjektiv përfshiheshin opinionet e analistëve të kapitalit, analistëve të vlerësimit të kredisë, konsulentëve bankarë dhe të ekspertëve të tjerë të përfshirë në industrinë bankare.

Referuar çmimit, Drejtori i Përgjithshëm dhe Anëtar Bordi i BKT, Z. Seyhan Pencablıgil tha: ‘’ Pavarësisht ngjarjeve me të cilat është përballur bota vitet e fundit, BKT ka dëshmuar një rritje të jashtëzakonshme në të gjithë portofolet e saj duke shënuar shifra historike në rritje, çdo vit. Kjo rritje por edhe treguesit e tjerë financiarë pasqyrojnë një performancë solide dhe konfirmojnë edhe njëherë pozicionin dhe angazhimin e BKT për të qenë banka lider në tregun bankar shqiptar.

Objektivat tona janë gjithmonë të jemi një bankë e qëndrueshme me performancë të fortë në të gjithë indikatorët financiarë, një bankë që mbështet me produkte dhe shërbime cilësore klientët tanë por edhe që kontribuon në rritjen ekonomike të vendit. Do të doja tia dedikoja këtë çmim ekipit tim për përkushtimin dhe profesionalizmin e tyre, klientëve tanë për besimin dhe besnikërinë e tyre dhe aksionerëve tanë për mbështetjen e vazhdueshme.’’

Themeluar në vitin 1925, BKT është banka më e madhe dhe më e vjetër tregtare në Shqipëri. Me një vlerë totale të asetit prej 4.6 miliard dollarë dhe depozita totale prej 3.7 miliard dollarë, BKT u shërben klientëve të saj përmes një rrjeti prej 63 degësh dhe kanalesh alternative novatore.

Top Channel