Pas katër seancave, Gjykata Anti Korrupsion kaloi në gjykim dosjen e inceneratorit të Fierit me 30 të dyshuar, midis tyre ish-ministri i Mjedisit Lefter koka, ish-sekretari i Përgjithshëm Alqi Bllako, si dhe ish-administratorë e kompani private që dyshohen se përfituan miliona nga faturat fiktive për punime të pakryera.
Alqi Bllako shpjegoi se detyra e tij si sekretar i përgjithshëm në kuptim të ligjit nuk ishte ajo e një funksionari të lartë dhe për këtë arsye akuza ishte përpiluar gabim.
Ndaj gjykata ishte dakord me Bllakon dhe urdhëroi SPAK të korrigjojë akuzën duke formuluar veprën e korrupsionit të nëpunësit publik.
E njëjta procedurë u ndoq për riformulimin e akuzës së korrupsionit në sektorin privat dhe funksionarëve publikë dhe për katër të tjerë midis tyre Klodian Zoton, italianin Ciafialonte dhe Arben Dervishaj. Gjykata nuk dha asnjë qëndrim për kërkesat e të dyshuarve për të aplikuar gjykimin e shkurtuar.
“Të gjitha dokumentat që kanë dalë në emrin e tij kanë rezulatuar të falsifikuara. Ndonëse këto fatura kanë dalë të falsifikuara u shtua një akuzë për Arben Dervishin për falsifikim”, tha avokati Gurali Brahimllari.
Gjykata korrigjoi situatën e të dyshuarit Robert Shabani për të cilin u pushua gjykimi mbasi rezulton se ai për të njëjtën rrethane ka qenë i dënuar më herët së bashku me të ndjerin Enver Shabani. Të dy ata më herët kërkuan ndryshim masë sigurie por nuk u dëgjuan e me urdhër gjykata vendosi drejtësi, ndonëse me vonesë, së paku për njërin prej tyre.
“Pushoi gjykimi për Robert Shabanin për shkak se ishte për të njëjtat kushte është dënuar nga Gjykata e Apelit për të njëjtin fakt për të njëjtën periudhë kohore e fatura, dolën në përfundim për ta pushuar”, u shpreh Jurgen Sinani-avokat i Robert Shabanit.
Të dy inceneratorët do të gjykohen tanimë veç e veç për afera korruptive e pastrim parash. Ndërkohë që është ndarë hetimi për ish-ministrin Arben Ahmetaj, i cili ende nuk është marrë në pyetje, ndonëse jo zyrtarisht pranohet se janë kontrolluar banesat e bashkëjetueses së tij Erjola Hoxha si dhe është vendosur sekuestro paraprake ndaj një vile në Palasë, që dyshohet se zotërohet nga ish-bashkëshortja e tij Albina Mancka.
Këto veprime janë kryer për llogari të hetimeve që po mbahen për katër veprat penale të korrupsionit, shpërdorimit të detyrës, pastrimit të parave dhe fshehjes së pasuri.
Top Channel
