Protestuesit në Izrael bllokojnë rrugët për në aeroport në demonstratën e fundit mbarëkombëtare

Njerëz ecnin drejt Terminalit 3 me valixhe për shkak të rrugës së bllokuar, ndërsa u shfaqën skena të asaj që quhet “Dita e Përçarjes”, sipas CNN.

Televizioni izraelit tregoi gjithashtu një protestë të veçantë në qytetin e Tel Avivit që dukej se numëronte mijëra demonstrues që valëvitnin flamuj izraelitë.

Kundërshtarët e planeve të qeverisë për t’i dhënë parlamentit të Izraelit, Knesset, fuqinë për të anuluar vendimet e Gjykatës së Lartë me një shumicë të thjeshtë kanë protestuar çdo të shtunë mbrëma në të gjithë Izraelin për nëntë javët e fundit. Protestat më të mëdha, në Tel Aviv, kanë tërhequr rregullisht më shumë se 100,000 demonstrues, në një vend me një popullsi prej pak më shumë se nëntë milionë banorë.

Paketa e legjislacionit do t’i jepte gjithashtu qeverisë autoritetin për të emëruar gjyqtarë, i cili aktualisht i takon një komiteti të përbërë nga gjyqtarë, ekspertë ligjorë dhe politikanë. Ai do të hiqte pushtetin dhe pavarësinë nga këshilltarët ligjorë të ministrive të qeverisë dhe do të hiqte fuqinë e gjykatave për të anuluar emërimet e qeverisë.

Protesta në aeroportin Ben Gurion erdhi disa orë përpara se Netanyahu të fluturonte në Romë për të takuar kryeministren italiane Giorgia Meloni.

Ajo u zhvillua gjithashtu ditën kur Sekretari i Mbrojtjes i SHBA Lloyd Austin mbërriti në Izrael për takime me Netanyahun dhe ministrin e Mbrojtjes Yoav Gallant. Austin fillimisht duhej të vinte në Izrael të mërkurën, por e vonoi mbërritjen e tij me një ditë me kërkesë të zyrtarëve izraelitë të shqetësuar për protestat, tha Pentagoni të mërkurën. Vendndodhja e takimit të tij u ndryshua gjithashtu për shkak të protestave, tha sekretari i shtypit i Pentagonit, Gjenerali Pat Ryde.

Top Channel