Shqipëria mbetet pa ambasador në Zvicër, Mustafa Nano jep dorëheqjen 25/12 01:14
Sipërmarrësi amerikan Jordan Belfort, konsulent në më shumë se pesëdhjetë kompani publike, autor i dy librave më të shitur dhe një folës motivues me famë botërore ka dhënë mbrëmjen e sotme një intervistë ekskluzive për “Top Story” mbi karrierën dhe jetën e tij.
Belfort ka treguar se suksesi i tij nisi në periudhën që ishte në burg, teksa personi me të cilin ndante qelinë u impresionua nga historia e jetës së Belfort dhe i sugjeroi atij të shkruante një libër.
Belford nisi të shkruajë librin teksa ishte në burg dhe e përfundoi atë pasi doli nga burgu, vepër e cila është bestseller.
XHORDAN BELFORT: “Pikërisht. Jeni e informuar. Po, kanadez shumë i njohur, Çong. Ishte dyshja komediane Çiç dhe Çong. Ai më duket se ishte Çiçi. Dhe ishte futur në burg për arsye qesharake. Jo për shitje marijuanë, që është e ligjshme tani në SHBA, por sepse kishte shitur tuba uji përtej kufirit shtetëror dhe donin ta bënin shembull, ndaj e dënuan me një vit e një ditë burg. Na futën në një qeli dhe ai po shkruante një libër për jetën. Unë s’po e bëja, s’e kisha si qëllim. I tregonim njëri-tjetrit historitë tona natën. Natën e tretë e të katërt më tha: “Kujtoja se po i sajoje këto, por të kërkova në Google dhe janë të vërteta. Duhet ta bësh libër. Jeta jote është çmenduri.” I thashë: “Vërtet? Të duket jeta ime çmenduri? Ngaqë është jeta ime. Po të jetë jotja, s’do të mendosh se është çmenduri.” Më tha: “Jam Tomi Çong, mendoj se është çmenduri, ndaj besomë, unë do ta lexoja librin.” Dhe ashtu nisa të shkruaj.
GRIDA DUMA: E mbaruat librin pasi dolët?
XHORDAN BELFORT: Po, ishte interesante. Mësova të shkruaj. E bëmë këtë bisedë kur filluam. Shkrimi s’është diçka që më vjen natyrshëm. Mësova të shkruaj, por hasa një libër, me titull “Zjarri i Kotësive”, nga një shkrimtar me nivel botëror, Tom Ulf. Sapo nisa të lexoj librin, mendova se doja të shkruaja si ai. Tre-katër muaj e përdora si libër udhëzimi, duke nënvizuar pjesët, që të kuptoja strategjinë. Si i paraqet personazhet, si krijon konfliktin, mënyrat që përdor për ta vazhduar ecurinë e ngjarjes. Para kësaj nuk shkruaja mirë. Ma përmirësoi shumë shkrimin dhe caktoi themelin, që pasi të dilja nga burgu të nisja të shkruaja “Ujkun e Wall Street”.
Top Channel
