Përfundon votimi në disa pjesë të Kentucky dhe Indiana, mbyllen qendrat e para të votimit në SHBA 06/11 00:14
Japonia tha të martën se dyshon “fuqishëm” se tre balona spiunazhi kineze kanë hyrë në hapësirën e saj ajrore midis viteve 2019 dhe 2021.
Ministria tha se i kishte kërkuar qeverisë kineze të “konfirmonte faktet në lidhje me këtë çështje përmes kanaleve diplomatike” dhe kërkoi me forcë që kjo të mos ndodhte më.
Pekini hodhi poshtë akuzat e Tokios të mërkurën.
“Ne e kundërshtojmë me vendosmëri fushatën shpifëse të palës japoneze kundër Kinës në mungesë të provave përfundimtare”, tha zëdhënësi i Ministrisë së Jashtme kineze Wang Wenbin në një konferencë.
Akuzat japoneze vijnë pasi një balone kineze fluturoi mbi Shtetet e Bashkuara në fillim të këtij muaji, e cila u rrëzua nga një avion i Forcave Ajrore të SHBA-së në brigjet lindore pranë Karolinës, ku pretendohet se ishte pjesë e një programi të madh të mbikëqyrjes ushtarake kineze.
Wang, zëdhënësi i Ministrisë së Jashtme kineze, akuzoi Tokion se ka rënë në hap me Uashingtonin me akuzat e tij të reja.
“Japonia duhet të mbajë një pozicion objektiv dhe të paanshëm dhe të ndalojë së ndjekuri SHBA-në duke u angazhuar në spekulime të qëllimshme”, tha Wang.
Ministria japoneze e Mbrojtjes paralajmëroi në deklaratën e saj se do të “përpiqet të mbledhë dhe monitorojë” çdo balonë që ka hyrë në hapësirën ajrore të Japonisë pa leje.
Ministri i Mbrojtjes Yasukazu Hamada tha gjithashtu se mund të rrëzonin ndonjë balonë të paautorizuar për të mbrojtur jetën dhe pronën e qytetarëve.
Top Channel
