Si ta bëni pallton tuaj të leshtë të duket sërish e re

Pavarësisht se çfarë mund të thotë etiketa e saj, shpesh mund ta lani pallton me kujdes në shtëpi.

Pastrimi është i rëndësishëm përpara se ta vendosni pallton në dollap për një kohë të gjatë.

Kjo pasi molat janë veçanërisht problematike kur copat e leshta ruhen për periudha të gjata.

AgroWeb.org ju njeh më poshtë me hapat që duhet të ndërmerrni për ta bërë pallton tuaj të duket si e re.

Çfarë duhet të bëni…

Filloni duke hequr së pari kokrrizat që formohen në sipërfaqen e palltos

Shfaqja e kokrrizave një shenjë se palltoja ka nevojë për vëmendjen tuaj. Krijimi i tyre ndodh kur pëlhura fërkohet me vetveten ose me veshje të tjera, duke shkaktuar formimin e topave të bezdisshëm.

Ju mund t’i hiqni me një brisk ose me një krehër të modeluar pikërisht për këtë punë. Pavarësisht çfarë mjeti përdorni, kriheni butësisht me lëvizje të shkurtra për poshtë. Mos e krihni në mënyrë shumë agresive sepse mund të dëmtoni pëlhurën.

Më pas, pastroni njollat

Para se të pastroni pallton tuaj, trajtoni çdo njollë të dukshme. Disa njolla, të tilla si yndyrat, vaji, vera ose gjaku, mund të kërkojnë fërkim me alkool ose uthull të bardhë, për një pastrim më të thellë. Siç ndodh pothuajse me çdo njollë, sa më gjatë të prisni për ta pastruar, aq më e vështirë do të jetë ta hiqni atë.

Më pas lajeni me lavatriçe ose me dorë

Kthejeni pallton mbrapsht, për të ndihmuar në parandalimin e ndonjë dëmtimi të mundshëm. Nëse lavatriçja juaj ka një cikël për rrobat e leshta, përdorni atë. Nëse jo, përdorni ciklin delikat.

Asnjëherë mos e lani leshin me temperatura të nxehta sepse kjo do të dobësojë fijet dhe të tkurrë pëlhurën. Sigurohuni që të përdorni gjithashtu një detergjent të butë.

Për të larë pallton tuaj me dorë, përdorni ujë të vakët së bashku me detergjentin e butë.

Ju nuk keni nevojë ta fërkoni ose shtrydhni pëlhurën. Zhyteni pallton në ujë dhe lëreni për rreth 30 minuta. Pastaj trazojeni butësisht për disa minuta.

Vazhdoni duke e shpëlarë derisa të mos ketë më shkumë.

Në fund, vendoseni për t’u tharë

Nëse e lani pallton tuaj me dorë, shmangni shtrydhjen e ujit, pasi kjo mund të prishë formën e palltos dhe të shkaktojë rrudha. Në vend të kësaj, shtrydheni butësisht ujin e tepërt nga çdo pjesë e shtresës. Vendoseni në një peshqir të pastër dhe të thatë dhe rrotullojeni për të thithur sa më shumë ujë.

Më pas vendoseni pallton të thahet. Kthejeni atë çdo 12 orë, derisa të jetë tharë plotësisht. Në varësi të trashësisë, kjo mund të zgjasë disa ditë. /AgroWeb

Top Channel