Nikos Dendias u prit nga homologia e tij Donika Gërvalla Schwarz.
E në vizitën e tij të tretë në Kosovë për këtë vit, ai u shpreh se dialogu është rruga drejt Bashkimit Evropian për Kosovën dhe Serbinë.
“E mbështesim dialogun mes Prishtinës dhe Beogradit me qëllimin e arritjes së një marrëveshjen ligjërisht të obligueshme dhe sipas ligjeve ndërkombëtare. Është e rëndësishme të respektohen nga të dyja palët të gjitha marrëveshjet e arritura, ky ishte mesazhi im i qartë edhe në Beograd dje“, tha Nikos Dendias, ministër i Punëve të Jashtme.
Shefi i diplomacisë greke foli edhe për çështjen e veriut, duke thënë që nuk duhet lejuar një palë e tretë të përshkallëzojë situatën.
“Nuk duhet të lejojmë palët e treta që të shfrytëzojnë rastin e të shkaktohet jostabilitet në rajon, në këtë drejtim mbështesim rolin e EULEX-it për stabilizim dhe mbështesim në punën e tyre edhe të dërguarin e BE-së, Miroslav Lajçak dhe atë të SHBA-së, Gabriel Escobar”, u shpreh Dendias.
Angazhimin e Greqisë me emërimin e emisarit për Ballkanin Perëndimor e mirëpriti Ministrja e Punëve të Jashtme të Kosovës, Donika Gërvalla Schwarz.
Në takimin mes ministrave të jashtëm të të dyja vendeve u fol edhe për energjinë dhe forcimin e bashkëpunimit.
Pas ndalesës në Prishtinë, ministri i Punëve të Jashtme të Greqisë Nikos Dendias shkon në Tiranë. Më herët, ai vizitoi edhe Shkupin e Beogradin.
Top Channel
