Në mesin e shqetësimeve për trazira, forca ndërkombëtare shtesë po dërgohen në veri të Kosovës për të garantuar sundimin e ligjit.
Përfaqësuesi i Lartë i BE-së për Politikën e Jashtme dhe Sigurinë, Josep Borell njoftoi se trupa të Forcës Evropiane të Xhandarmërisë, pjesë e karabinierëve italianë, kanë zbarkuar në zonë dhe do ta mbështesin përkohësisht EULEX-in.
“Në këto kohëra të tensionuara në Kosovë, misioni i BE-së për sundimin e ligjit EULEX përmbush detyrën që ka për të garantuar stabilitet: Forca Europiane e Xhandarmërisë, pjesë e Karabinierëve, mbërriti atje ne qëllim të përforcojë përkohësisht Njësinë Policore të EULEX-it. Ky mision do të vazhdojë të mbështesë një mjedis të sigurt”– u shpreh Borrell.
Në pjesën veriore të Kosovës, kryesisht në pikën kufitare të Jarinjës është shtuar numri i pjesëtarëve të EULEX-it, pas tërheqjes së ‘Listës Serbe’ nga të gjitha institucionet e Kosovës. Në Jarinjë janë dislokuar më së shumti policë nga kontingjenti polak, të cilët janë duke e ndjekur situatën nga afër.
Nga ana tjetër, mes kësaj pike dhe Mitrovicës së Veriut, në rrugën kryesore janë stacionuar gjithashtu ushtarë të misionit paqeruajtës të NATO-s, KFOR. Disa orë më herët, edhe zëdhënësi i Departamentit Amerikan të Shtetit, Ned Price, gjatë një konferencë për media, tërhoqi vëmendjen për bnjë përshkallëzim të mundshëm të situatës pas bojkotit të institucioneve të Kosovës nga serbët.
Price tha se “Shtetet e Bashkuara të Amerikës pajtohen me Bashkimin Evropian se zhvillimet e fundit janë shqetësuese dhe vënë në rrezik progresin e rëndësishëm të arritur deri tani në dialogun e ndërmjetësuar nga BE”.
Top Channel
