Turizmi në Përmet/ U shtuan vizitorët, operatorët lokalë: Sezoni të vazhdojë dhe në dimër

Si destinacione të përshkuar nga Vjosa, Përmeti dhe Këlcyra kanë pasur gjatë kësaj vere në qendër të ofertës sportet e ujit por edhe ecjet në këmbë apo biçikleta, eksplorimin e kanioneve të Lengaricës, ngjitjen e shkëmbinjve apo udhëtimet me mjete jashtë rruge.

Operatorët lokalë flasin për ndryshim të profilit të klientëve, rritjen me gati 50% të vizitorëve shqiptarë por për një fluks spontan që u karakterizua nga prenotime të momentit të fundit. Problematikë madhore e këtij sezoni për ata që operojnë buzë Vjosës vijoi të mbetet ndotja plastike në lumë dhe në brigjet e tij.

Sezoni i verës së vitit 2022 shënoi kulmin e rezervimeve në bujtinat rurale në të gjithë territorin pranë Vjosës, në Peshtan, Ogdunan, Gostivisht, Ballaban, Buhal, Gravovë. Vizitorët këtë vit vijnë nga e gjithë bota me një tendencë në rritje të klientëve nga Europa Perëndimore dhe një zbehje të tregut të Lindjes.

Valentina që menaxhon një bujtinë në Peshtan thotë se ka vijuar të zgjerojë investimin për shkak të kërkesës në rritje të vizitorëve.

Përmeti vijon të vizitohet edhe për shijet lokale, salcën e shakullit, peshkun e lumit, mishin e gjahut, glikotë e frutave, rakinë dhe verën.

Përmeti he Këlcyra u vizituan këtë vit nga rreth 80 mijë vizitorë që rritën kohëqëndrimin e tyre me të paktën një ditë në raport me vitin e kaluar. Ky sezon nxori në pah edhe aspektet ende të brishta e të pakonsoliduara të turizmit në këtë zonë, si kapacitete pritëse dhe restorante  të pamjaftueshme, mungesa të stafit,dhe guidave, mungesë informacioni dhe orientimi efektiv për të parandaluar aksidentet. Vetëm këtë verë të paktën në 5-6 raste turistë të huaj ngelën të bllokuar në kanionet e Lengaricës ndërsa eksploronin të paguiduar.

Top Channel