Rritet bilanci i viktimave nga përmbytjet në Pakistan, paralajmërime për sëmundje

Mjekët paralajmërojnë se mungesa e ujit të pastër po shkakton një rritje të sëmundjeve në Pakistan, ndërsa numri i të vdekurve nga përmbytjet ka kaluar shifrën 1200.

Sigurimi i ujit të pastër është problemi më i madh për ata që përpiqen të gjejnë ushqim dhe strehim, tha organizata bamirëse mjekësore, “Mjekët pa Kufij”.

Qeveria u mblodh të shtunën për të vlerësuar shkallën e përmbytjeve që kanë zhytur një të tretën e vendit. Të paktën një në tre nga viktimat e përmbytjeve thuhet se janë fëmijë.

Ministri i qeverisë, Ahsan Ikbal tha se vendi nuk ka burime për t’u marrë me krizën.

“Përmbytjet janë fatkeqësia më e keqe e shkaktuar nga klima në historinë e fundit botërore”, tha ai.

Rreth 1.4 milion shtëpi u shkatërruan nga shirat rekord që kanë prekur më shumë se 33 milionë njerëz.

Zyrtari më i lartë i menaxhimit të fatkeqësive të vendit tha se viti 2022 kishte sjellë disa realitete të ashpra të ndryshimit të klimës për Pakistanin.

“Këtë vit nuk dëshmuam një sezon pranvere,  u përballëm me katër valë të të nxehtit që shkaktuan zjarre në shkallë të gjerë pyjore në të gjithë vendin”, tha Akhtar Nawaz.

Ndërkohë, agjencia e OKB-së për fëmijë UNICEF tha se më shumë fëmijë rrezikoheshin të vdisnin nga sëmundjet në Pakistan për shkak të mungesës së ujit të pastër.

“Tani ekziston një rrezik i lartë i përhapjes së shpejtë të sëmundjeve vdekjeprurëse të shkaktuara nga uji, diarre, kolera, dengoja, malaria. Prandaj ekziston rreziku i shumë më tepër fëmijëve të vdekur”, tha Abdullah Fadil nga UNICEF.

Vlerësimet sugjerojnë se përmbytjet kanë shkaktuar të paktën 10 miliardë dollarë dëme në Pakistan dhe shumë vendas po përballen me mungesa serioze ushqimore. Gati gjysma e të korrave të vendit janë shkatërruar.

Vendi po vuan tashmë nga një krizë ekonomike. Pakistani prodhon më pak se një për qind të emetimeve globale të gazeve serrë, por gjeografia e tij e bën atë jashtëzakonisht të prekshëm ndaj ndryshimeve klimatike.

Shumë faktorë kontribuojnë në përmbytjet, por ndryshimet klimatike i bëjnë më të mundshme reshjet ekstreme.

Bota tashmë është ngrohur me rreth 1.2C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.

Top Channel