Këshilli i Prindërve të Kosovës ka paralajmëruar se do të bojkotojnë zëvendësimin e orëve të humbura nga greva që po mbahet në arsim.

Përmes një njoftimi, nga Këshilli thuhet se do të mobilizohen dhe do t’u bëjnë thirrje të gjithë prindërve që të mos i lejojnë fëmijët e tyre që t’i zëvendësojnë orët që kanë humbur.

“Duke shprehur indinjatën tonë të thellë për mos lëvizjen e palëve drejt dialogut social dhe vazhdimin e dëmtimit kryekëput të interesit të fëmijëve dhe prindërve, ia bëjmë të ditur të gjitha institucioneve se Kryesia e Këshillit të Prindërve të Kosovës do të mobilizohet dhe do t’ju bëjë thirrje të gjithë prindërve që të bojkotohet zëvendësimi i orëve të humbura nga greva”, thuhet në reagim.

Ata shtojnë se “nuk duam të pranojmë edhe të dëmtohemi nga greva edhe t’ju përshtatemi orareve jashtë ditëve të punës apo jashtë kalendarit vjetor të mësimit”.

Që prej 25 gushtit, në grevë janë mësimdhënësit, edukatorët në kopshtet publike, punonjësit civilë në institucionet lokale dhe qendrore të Kosovës.

Kërkesa kryesore e sindikatave të këtyre punonjësve  drejtuar Qeverisë së Kosovës është ndarja e 100 eurove për punëtorët, derisa të hyjë në fuqi projektligji për pagat.

Top Channel