Scholz pro anëtarësimit të shpejtë të vendeve të Ballkanit Perëndimor në BE

Nga Praga, zoti Scholz tha se Bashkimi Evropian duhet të jetë në gjendje të diskutojnë dhe të arrijë një marrëveshje për një sërë ndryshimesh, në mënyrë që t’u bëjë ballë rivalëve të jashtëm si Rusia dhe Kina.

Kancelari gjerman Olaf Scholz i bëri thirrje të hënën vendeve të Bashkimit Evropian që të jenë në gjendje të diskutojnë dhe të arrijë një marrëveshje për një sërë ndryshimesh, në mënyrë që t’u bëjë ballë rivalëve të jashtëm si Rusia dhe Kina.

Në një fjalim në Universitetin “Charles” në Pragë, zoti Scholz tha se BE-ja duhet të jetë gati për zgjerimin, vendime këto që kërkojë votime në unanimitet.

Sipas tij agresioni rus në Ukrainë është një thirrje që Bashkimi Europian duhet të zgjohet dhe të ndryshojë mënyrën se si merr vendime. E sa i përket zgjerimit, Kancelari gjerman tha se është pro mbështetjes për Ballkanin Perëndimor.

“Unë jam i përkushtuar për zgjerimin e Bashkimit Evropian, duke përfshirë shtetet e Ballkanit Perëndimor, Ukrainën, Moldavinë dhe në të ardhmen edhe Gjeorgjinë. Zgjerimi i BE-së është i nevojshëm për të siguruar stabilitet brenda Evropës dhe për të mbrojtur vlerat e përbashkëta. Këshilli Evropian i dha statusin e vendit kandidat Ukrainës dhe Moldavisë në qershor dhe siguroi perspektivën europiane për Gjeorgjinë. Tani është një çështje që të merren seriozisht premtimet për anëtarësim. Vendet kandidate meritojnë mbështetje të vazhdueshme në rrugën e tyre për t’u kualifikuar. Vendet e Ballkanit Perëndimor kanë gati 20 vjet që presin anëtarësimin”, tha kancelari gjerman.

Ndërsa Evropa mbetet pas rivalëve globalë kur bëhet fjalë për dixhitalizimin dhe eksplorimin e hapësirës, zoti Scholz tha se BE-ja mund të bëhet një udhëheqës global në tranzicionin drejt një ekonomie më të gjelbër që do ta ndihmonte gjithashtu të bëhej më pak e varur nga furnizuesit e huaj të energjisë. Gjermania, e cila deri vonë ka mbetur prapa vendeve të tjera të NATO-s përsa i përket shpenzimeve ushtarake, planifikon të investojë shumë në mbrojtjen e saj ajrore në vitet e ardhshme.

Në fjalimin e tij, kancelari Scholz përmendi në mënyrë të përsëritur kërcënimin e paraqitur ndaj BE-së nga Rusia

“Çdo përçarje mes nesh, çdo dobësi, do të përdoret nga Vladimir Putini. Ne duhet të mbyllim konfliktet e vjetra dhe të gjejmë zgjidhje”, tha kancelari gjerman.

Sipas analistëve fjalimi u zotit Scholz iu bën jehonë propozimeve të bëra muajt e fundit nga presidenti francez Emmanuel Macron, i cili propozon që vendimet në bllokun evropian të merren me dy të tretat e votave dhe vendet e vogla thonë se këto ndryshime mund të anashkalojnë shqetësimet e tyre.

Propozimet e tij thonë analistët ka të ngjarë të pranohen me kujdes nga vendet më të vogla, që kanë frikë nga reformimi i proceseve të vështira vendimmarrëse të BE-së.

Tensionet janë ndezur gjithashtu vitet e fundit midis Komisionit Evropian dhe qeverive të Hungarisë dhe Polonisë, me Brukselin që i akuzon ato vende për shkelje të vlerave themelore të bllokut dhe parimit të sundimit të ligjit.

Top Channel