Dy turistë francezë kanë telefonuar policinë pasditen e kësaj të enjteje, pasi mbetën të bllokuar teksa eksploronin në këmbë zonën e quajtur “Kanioni i Langaricës”, në Përmet.
Mësohet se ata mbetën të bllokuar rreth orës 16:15 në pjesën e kanionit, për shkak të rritjes së nivelit të ujit në lumin e Langaricës, nga reshjet e shiut.
Menjëherë pas marrjes së njoftimit, shërbimet e Komisariatit të Policisë Përmet janë nisur në drejtim të zonës ku kishin mbetur të bllokuar turistët.
Shërbimet e Komisariatit të Policisë Përmet, në bashkëpunim me shërbimet zjarrfikëse dhe punonjësit e subjektit privat, ndërhynë duke bërë të mundur lokalizimin e turistëve, në Kanionin e Langaricës.
Gjatë kërkimit për 2 turistët francezë, i është dhënë ndihmë dhe një të moshuari, i cili gjithashtu kishte mbetur i bllokuar në këtë zonë.
Dy turistët dhe i moshuari u nxorrën nga terreni i vështirë ku ishin bllokuar dhe më pas u është ofruar kontrolli mjekësor. Aktualisht, ata ndodhen në gjendje të mirë shëndetësore.
Top Channel
