Një ditë pas tragjedisë së Himarës, ku gomonia përplasi një vajzë të vogël, në plazhet e vendit kanë nisur kontrollet ndaj mjeteve lundruese.
Gjatë natës, në Sarandë u bllokuan tre “Jet Ski”, pasi më herët qytetarët i kishin filmuar këto mjete teksa lëviznin pranë bregut dhe bënin manovra të rrezikshme.
Situata në Durrës sot duket e qetë. Një pjesë e mjeteve lundruese nuk kanë dalë në det, megjithatë vihet re prezenca e disa skafeve pranë zonës ku notojnë pushuesit.
Në vijën bregdetare, nga Ura e Dajlanit deri në Malin e Robit janë nëntë baza të dedikuara për mjetet ujore, që sipas Policisë Kufitare janë me leje. Vetë pushuesit kërkojnë më shumë baza. Ata thonë se janë të pasigurt dhe duan që këro vendbazime të jenë në zona të distancuara nga zona ku janë zhezlongët dhe notojnë qytetarët.
Gjatë kontrolleve, këtë të mërkurë në Durrës janë konstatuar 3 skafe të vegjël, të cilët rezultuan pa dokumentacionin e nevojshëm gjatë kontrollit.
Edhe në plazhin e Velipojës, sot ka më pak lëvizje të motorëve të ujit. Në këtë qytet më pak mjete lundruese. Janë disa stacione të vogla, nuk ka skafe apo gomone të mëdha. Një ditë pas strategjisë në Himarë, duket se sot në Velipojë “janë zhdukur skafet”, ndërsa është caktuar mirë zona në të cilën lejohet lëvizja e tyre.
Në Potam të Himarës, plazhi nuk është më i njëjtë pa pushuesen e vogël. Në vendin ku ndërroi jetë Jonada Avdiu janë vendosur lule, ndërsa plazhi është thuajse i boshatisur nga pushuesit.
Top Channel
