Së shpejti në Parkun e Gjelbër të Liqenit Artificial do të vendoset shtatorja e Shenjtores shqiptare, Nënë Terezës si një vend lutjeje për të gjithë komunitetin e besimtarëve katolikë.
Pas Meshës në Katedralen e Shën Palit, kreu i Bashkisë së Tiranës, Erion Veliaj uroi festën me këtë lajm të mirë për besimtarët.
“Gëzuar të gjithëve Festën e Pashkëve! Pashka, apo “Passover”, pavarësisht gjuhës, është një festë e kalimit. Ne kalojmë nga një moment i vështirë, në një moment të bukur; Krishti kaloi nga vdekja në jetë. Ne po kalojmë nga një moment i pandemisë në një moment të hapjes; nga një moment i shkatërrimit prej tërmetit, në një moment të rindërtimit; nga një moment ku kemi qenë të mbyllur, në një moment ku duhet të dalim të shijojmë jetën. Secili prej nesh e ka një ditë reflektimi, për të kuptuar se kemi nevojë të bëhemi pak më të mirë, pak më të hapur, pak më të dëgjueshëm, pak më solidarë. Besoj se e kemi fuqinë, e kemi treguar që ne, si shqiptarë, kur bashkëpunojmë bëjmë gjëra të mrekullueshme,” uroi Veliaj.
Kryebashkiaku ndau gjithashtu lajmin se së shpejti në Parkun e Gjelbër të Liqenit Artificial do të vendoset shtatorja e Shenjtores shqiptare, Nënë Terezës, e cila, tha ai, do jetë një vend lutjeje për të gjithë komunitetin e besimtarëve katolikë.
“Me Monsinjorin kemi diskutuar që, në kodrat e Liqenit, te vendosim një shtatore të Nënë Terezës, si një vend lutjeje e reflektimi. Shumë njerëz nuk e kanë fatin të prodhojnë shenjtorë, ne e kemi dhe ndonjëherë nuk reflektojmë aq sa duhet për këtë pasuri të madhe kombëtare. Qyteti i Tiranës, ashtu siç mori vendimin për t’i rikthyer Kishën e Shën Prokopit Kishës Ortodokse, tani do fillojë shumë shpejt vendosjen e shtatores për të përkujtuar Nënë Terezën, Shenjtoren që Shqipëria i dha botës. Është një kontribut i vogël për gjithë komunitetin e besimtarëve”, deklaroi kryetari i Bashkisë.
Ai e quajti një muaj fantastik për Tiranën, ku edhe për myslimanët, që janë në Muajin e Shenjtë të Ramazanit, së shpejti do përfundojë Xhamia e re:
“Kemi pashkët e të gjitha besimeve, kemi Ramazanin dhe Bajramin. Presim hapjen e Xhamisë së re. Unë them se në një vend ku mbizotëron harmonia, nuk ka asnjë arsye pse të jemi të ndarë e të përçarë me njëri-tjetrin. Paçi vetëm ditë të mira! Gëzuar!”
Kryetari i Bashkisë zhvilloi një vizitë edhe në Vëllazërinë Ungjillore të Shqipërisë, ku u prit nga Pastor Ylli Doçi.
Top Channel
