Infermierët në sistemin shëndetësor në vend do të paguhen edhe në bazë në performancës së tyre në punë, sipas ministres së Shëndetësisë, Ogerta Manastirliu.
Në Konferencës e Parë Ndërkombëtare “Roli i Infermierëve në Shërbimin e Kujdesit Shëndetësor Parësor Përballë Sfidave të Reja Shëndetësore”, të organizuar nga Urdhri i Infermierëve të Shqipërisë, me mbështetjen e Ministrisë së Shëndetësisë dhe Mbrojtjes Sociale dhe Qeverisë Zviceriane, përmes projektit “Shëndet për të Gjithë”, Ogerta Manastirliu tha se i është rikthyer dinjiteti profesionistëve, duke filluar nga uniformat e standardizuara dhe përmirësimi i kushteve të punës.
“E kujtoj pak vite më parë se si ishin infermierët në QSUT, nuk dallohej kush kishte bënte sanitarin, kush infermierin, kush doktorin. Sot ky realitet është si nata me ditën. Nga ana tjetër, me vizionin e qeverisë shqiptare dhe investimin që qeveria shqiptare ndërmori për programin e rehabilitimit të qendrave shëndetësore, sot më shumë se 1 milionë e 500 mijë shqiptarë marrin shërbime dinjitoze në këto qendra shëndetësore. Këtu i referohem vetëm fazës së parë të këtij programi, pasi ne jemi të përkushtuar dhe të angazhuar që deri në fund të këtij mandati, të kemi përmirësuar tërësisht të gjitha qendrat shëndetësore dhe ambulancat nga pikëpamja e infrastrukturës, pajisjeve që duhet të kenë por mbi të gjitha dhe pajisjes me aftësitë e nevojshme për personelin infermieror dhe atë mjekësor që sot shërbejnë në kushte dinjitoze”, tha Manastirliu.
Duke folur për rritjen e pagave për infermierët, Manastirliu u shpreh se do të shihet mundësia edhe e pagesës për performancë. “Infermierët kanë paga më të mira sepse vetëm vitin e shkuar, ne i rritëm 40% pagat e infermierëve, njësoj siç bëmë me mjekët. Dhe rritja e pagave është një proces që nuk ka mbërritur në fund, sepse do e vijojmë me rritjen 6% të pagave këtë vit dhe 40% brenda këtij mandati. Por paralelisht do të vijojmë të vlerësojmë edhe mundësinë e mbështetjes për performancën në sistemin shëndetësor parësor”, tha Manastirliu.
Ministrja e Shëndetësisë dhe Mbrojtjes Sociale tha se nuk do të ketë kthim mbrapa, kur foli për mënyrën e rekrutimit të infermierëve në vend.
“Secili nga ju me dijet e veta, me meritokraci dhe transparencë futet në sistemin shëndetësor, dhe kjo është t’iu rikthesh profesionistëve dinjitetin. ‘Infermierë për Shqipërinë’ është një instrument ligjor që na ka mundësuar ne në katër vite, të përfshijmë në sistemin tonë të kujdesit shëndetësorë 4400 infermierë, laborantë, fizioterapistë, logopedistë dhe teknikët e shkencave mjekësore, të punësohen nëpërmjet këtij portali, ashtu sikurse dhe mjekët në sistemin tonë shëndetësorë”, tha Manastirliu.
Duke vlerësuar rolin e infermierëve sidomos gjatë periudhës së pandemisë, Manastirliu tha se në Strategjinë e re të Kujdesit Shëndetësor Parësor, infermieri merr një rol kyç në sistem.
“E para në riorganizimin e qendrave të kujdesit parësor, në kategorizimin e tyre apo në rikategorizimin e tyre për të përshtatur nevojat, zhvillimet demografike, situatën epidemiologjike me statusin e qendrave shëndetësore në terren, ambulancave, qendrave 24 orëshe që ofrojnë shërbime apo edhe asaj që ne duam që të ndërtojmë, që janë pikërisht qendrat socio-shëndetësore dhe qendrat e mjekësisë familjare. Roli i infermierit është vendosur në qendër të gjithë sistemit të kujdesit parësor dhe hapat që kjo strategji parashikon në funksion të zhvillimit të kujdesit parësor janë në drejtim të rritjes së rolit të infermierit përsa i përket shërbimit të kujdesit në familje, për të cilin jemi duke punuar me fakultetin e shkencave teknike mjekësore, përmes programit të dedikuar të masterit për infermierët e shërbimit në familje”, tha Manastirliu.
Ambasadori i Zvicrës në Shqipëri, Adrian Maitre, vlerësoi rolin e infermierëve, për të përmirësuar shërbimin shëndetësor.
“Qeveria shqiptare synon transformimin e shërbimit të kujdesit shëndetësor parësor në përgjigje të nevojave të popullatës. Ne pamë sot disa përqindje të shpërndarjes së personelit shëndetësor në Shqipëri dhe duhet të marrim parasysh këto shifra dhe nevojat specifike. Zvicra mbështet plotësisht këtë synim dhe ne, së bashku me partnerë të tjerë ndërkombëtarë, jemi gati të vazhdojmë mbështetjen tonë nën drejtimin dhe koordinimin e Ministrisë. Së bashku, mund të përdorim më mirë burimet tona, qofshin ato të jashtme ose vendase, për të arritur nevojat dhe synimet kombëtare”, tha Maitre.
Infermierët përbëjnë mbi 73% të të gjithë personelit shëndetësor në Shqipëri, ndërsa çdo vit licensohen mbi 1300 infermierë. Në katër vitet e fundit janë punësuar në sistemin shëndetësor publik 4400 infermierë dhe profesionistë të shkencave mjekësore teknike përmes portalit “Infermierë për Shqipërinë” ndërsa janë në listë pritje mbi 2300 infermierë në portal.
Top Channel
