Xhaçka me trupin diplomatik: Në shqyrtim anulimi i marrëveshjeve për lëvizjen në Shqipëri të diplomatëve, zyrtarëve dhe biznesmenëve rusë

Ministrja tha se Shqipëria është rreshtuar me BE-në dhe po zbaton në territorin e saj masat kufizuese të miratuara nga Këshilli Evropian kundër Rusisë për cenimin ose kërcënimin e integritetit territorial, sovranitetit dhe pavarësisë së Ukrainës.

Sipas ministres, u vendos ndalimi i hyrjes në territorin shqiptar për personat e listuar nga Bashkimi Evropian.

“Siç e dini të gjithë ekzistojnë dy kategori kryesore të sanksioneve, ekonomike dhe individuale. Kemi miratuar sanksione në lidhje me ngrirjen e pasurive të 654 individëve dhe 52 subjekteve. Individë, duke filluar nga Presidenti i Rusisë, Ministri i Punëve të Jashtme të Rusisë, anëtarë të Këshillit të Sigurisë Kombëtare të Federatës Ruse, të cilët mbështetën njohjen e menjëhershme nga Rusia si subjekte të pavarura të dy zonave Donetsk dhe Luhansk, anëtarë të shtetit rus Duma, e cila ratifikoi vendimin e qeverisë për Traktatin e Miqësisë, Bashkëpunimit dhe Ndihmës së Ndërsjellë ndërmjet Federatës Ruse dhe këtyre dy subjekteve. Gjithashtu, është vendosur ndalimi i hyrjes në territorin shqiptar për personat e listuar nga BE, ndërsa në lidhje me politikën tonë të vizave ndaj Rusisë po shqyrtojmë anulimin e të gjitha marrëveshjeve për lëvizjen e diplomatëve dhe zyrtarëve rusë dhe biznesmenët”, tha Xhaçka.

Vendi ynë i është bashkuar gjithashtu sanksioneve ekonomike të BE-së që përfshijnë masa kufizuese në financa, energji, transport dhe teknologji.

“Ne i jemi bashkuar gjithashtu sanksioneve ekonomike të BE-së që përfshijnë masa kufizuese në financa, energji, transport dhe teknologji. Dje, ne gjithashtu u rreshtuam dhe filluam miratimin e legjislacionit për zbatimin e vendimit të Këshillit për masat e mëtejshme kufizuese në lidhje me financat dhe aviacionin. Kufizimet përfshijnë:

• Ndalimi i çdo transaksioni me Bankën Qendrore të Rusisë; si dhe
• mohimi i lejes për t’u ulur, për t’u ngritur nga, ose për të fluturuar mbi territoret e BE-së për çdo avion të operuar nga transportuesit ajrorë rusë, duke përfshirë si transportues marketingu, çdo avion të regjistruar në Rusi dhe për avionë jo të regjistruar në Rusi që janë në pronësi ose të autorizuar ose të kontrolluar ndryshe nga një person juridik ose fizik rus.

Më tej, dje Shqipëria iu bashkua masave kufizuese që synojnë Bjellorusinë për rolin e saj në këtë luftë. Së fundmi, Shqipëria nuk do të marrë pjesë më në asnjë aktivitet sportiv me të cilin përballet Federata Ruse derisa të përfundojë pushtimi i Ukrainës”, sipas ministres.

Ministrja  deklaroi se ngjarjet në Ukrainë dëshmojnë se izolimi i Ballkanit Perëndimor është kosto e lartë për BE-në.

“Ngjarjet në Ukrainë janë dëshmi se shqetësimet tona ishin të justifikuara. Kjo e bën shumë të qartë se kostoja e izolimit është shumë më e lartë se kostoja e integrimit. Sinjalet që po marrim tani tregojnë se BE-ja është e fokusuar tani siç nuk ka qenë për një kohë. Nëse BE-ja është e bashkuar dhe e përkushtuar, nëse tregon të njëjtën vendosmëri siç po tregon në mbështetje të Ukrainës tani, rajoni ynë, Ballkani Perëndimor nuk do të jetë më i prekshëm ndaj përpjekjeve për të nxitur telashe dhe grindje dhe do të përfitojë siguria e Evropës në tërësi”, nënvizoi Xhaçka.

Gjatë mbledhjes mbajtën fjalën edhe ambasadorja e SHBA-së, Yuri Kim; ambasadori i Ukrainës në Tiranë, Volodymyr Shkurov dhe ambasadori i BE-së, Luigi Soreca.

Ambasadori i Ukrainës në Tiranë, Shkurov vlerësoi qëndrimin e Shqipërisë ndërsa theksoi se pavarësisht provokimeve, sistemet bazë të vendit të tij dhe sektori i energjisë po funksionojnë në mënyrë të qëndrueshme.

Ambasadorja amerikane në Tiranë, Yuri Kim tha se “jemi të gjithë të befasuar me veten, për shpejtësinë, vendosmërinë, këmbënguljen, seriozitetin dhe sakrificën; kjo nuk vjen pa sakrifica – me mënyrën se si ne po i përgjigjemi, duke i dalë në mbrojtje Ukrainës, por edhe duke dalë në mbrojtje të mënyrës sonë të jetesës”.

Kim u shpreh gjithashtu se do i dalin në mbrojtje Ukrainës duke shprehur vlerësimin për Shqipërinë si bashkëpendëmbajtëse në çështjen e Ukrainës.

Sipas ambasadorit të delegacionit të BE, Luiggi Soreca, Komisoni Evropian po shqyrton aplikimin direktivës së mbrojtjes së përkohshme, e cila nëse miratohet nesër në Këshillin e Ministrave te Drejtësisë dhe të Brendshëm të vendeve anëtare të BE-së do të sigurojë një mbrojtje të plotë për qytetarët ukrainas deri në tre vite në secilin vend të BE-së.

Në takim, ku u shpreh mbështetja për bashkëpunim për përballimin e situatës së vështirë, morën pjesë edhe ambasadorë të vendeve anëtare të NATO-s e BE-së, të rajonit dhe të vendeve të tjera të cilat kanë shprehur linjëzimin me sanksionet ndaj Rusisë pas agresionit në Ukrainë.

Tensioni në territorin ukrainas sa vjen e rritet, ndërsa jemi në ditën e gjashtë të luftës. Ushtria ruse ka intensifikuar bombardimet në Kharkiv dhe qytete të tjera, ndërsa një autokolonë ushtarake ruse prej 60 kilometrash ka mbërritur aktualisht në portat e kryeqytetit ukrainas.

Me ritme proceduriale të paimagjinueshme në kushte të tjera, Parlamentin Europian voton këtë pasdite për t’i dhënë Ukrainës zyrtarisht statusin e vendit kandidat për në BE dhe hapur rrugën e pranimit në bllok.

Top Channel